“Bu, Qarabağın Azərbaycan torpağı kimi qəbul edildiyini və beynəlxalq səviyyədə tanındığını göstərir” - Deputat
Cənubi Qafqazda baş verən mühüm hadisələr sırasında bu günlərdə Xankəndidə keçirilən İqtisadi Əməkdaşlıq Təşkilatının (İƏT) zirvə görüşü həm siyasi, həm iqtisadi, həm də simvolik baxımdan xüsusi önəm daşıyır. Bu görüş təkcə regional əməkdaşlıq çərçivəsində yeni bir mərhələnin başlanğıcı deyil, həm də Azərbaycanın suverenliyi və ərazi bütövlüyünün beynəlxalq səviyyədə qəbulunun real təzahürü kimi dəyərləndirilir. Münaqişədən sonrakı dövrdə Qarabağda keçirilən bu səviyyəli beynəlxalq tədbir regionun diplomatik və iqtisadi mərkəzə çevrilməkdə olduğunu göstərməklə yanaşı, beynəlxalq ictimaiyyətin də bu prosesə verdiyi dəstəyi açıq şəkildə nümayiş etdirir.
Mövzu ilə bağlı Milli Məclisin deputatı Azər Allahverənov Crossmedia.az-a açıqlama verib: “Ümumiyyətlə, İqtisadi Əməkdaşlıq Təşkilatının Xankəndidə zirvə görüşünün keçirilməsi təkcə regional, iqtisadi əməkdaşlıq baxımından deyil, həm də siyasi, diplomatik və müəyyən mənada simvolik cəhətdən çox böyük əhəmiyyətli bir hadisədir və bunun bir neçə mühüm aspektləri var. İlk əvvəl onu deyim ki, Azərbaycan ərazi bütövlünün tanınması və möhkəmləndirilməsi nöqteyi-nəzərdən Xankəndində beynəlxalq təşkilatın tədbirinin keçirilməsi faktiki olaraq Qarabağın Azərbaycan torpağı kimi qəbul edildiyini və beynəlxalq səviyyədə tanındığını göstərir. Həmçinin İƏT-ə üzv ölkələrin bu tədbirdə iştirakı həmin dövlətlərin Azərbaycanın suverenliyini və ərazi bütövlünü dəstəyinin bir növ göstəricisidir”.
Deputat həmçinin bildirib: “İkinci bir tərəfdən, post-münaqişə dövrünün yeni mərhələyə keçidi kimi xarakterizə etsək, təbii ki, bu zirvə görüşü Azərbaycanın Qarabağda nəinki hərbi və inzibati nəzarəti bərpa etdiyini, həm də regionun iqtisadi və diplomatik mərkəzə çevrilməyə başladığını göstərir. Xankəndində belə bir tədbirin təşkili, ölkənin reinteqrasiyası və bərbası prosesində də şübhəsiz ki, çox mühüm rol oynayır. Çünki nəticə etibarilə bir sıra dövlət rəhbərlərinin, başçılarının bu tədbirdə birbaşa olaraq iştirak etməsi, yəni gələcəkdə bu ərazidə hətta keçilən böyük bərpa quruculuq işlərində həm də bu dövlətlərin ayrı-ayrı şirkətlərinin investisiyaya qoya biləcək, sərmayə yatıra biləcək dairələrinin geniş iştirakını təmin edə biləcək. Eyni zamanda İƏT-in regionda fəallığının artdığı da gözə çarpacaq dərəcədədir. Xüsusilə Qarabağda belə bir tədbirin keçirməsi, o tədbirin regional rolunu və nüfuzunu, regionun əhəmiyyətini və nüfuzunun artığını göstərən bir hal kimi dəyərləndirilir. Bu, həm də təşkilatın üzv ölkələr arasında iqtisadi əlaqələrin genişləndirməsi üçün də çox geniş imkanlara malik olan A platformasının qurulmasına xidmət edir”.
Azər Allahverənov tədbirin əhəmiyyətini göstərən bir digər məqamı da vurğulayıb: “Təbii ki, ölkə başçılarının da, xüsusilə də İƏT-in üzv ölkələrin başçılarının bu mötəbər tədbirdə iştirak etməsi həmin tədbirin nüfuzunu artırmış olur. İƏT-in konkret olaraq, eyni zamanda Qarabağ bölgəsində müəyyən bir strateji fəaliyyət spektrlarının müəyyənləşdirilməsi, konturlarının cızılması nöqteyi nəzərindən də təbii ki, çox əhəmiyyətlidir. Nəticə etibarilə həm Qarabağ bölgəsinin əhəmiyyətini artırır, həm də bu tədbir İƏT-ə yeni nəfəs verir, yeni fəaliyyət istiqamətləri verir. Yəni İƏT-ə üzv olan dövlətlər demək olar ki, hər biri bu bölgədə geniş inteqrasiya layihələrinin həyata keçirilməsində yaxından iştirak etmək imkanı əldə edirlər”.
Ayhan
15:00 05.07.2025
Oxunuş sayı: 19562
