Misir İsrail və İranı atəşkəsə çağırır
Misirin Xarici İşlər naziri Bədr Əbdüləti ABŞ-nin Yaxın Şərq üzrə xüsusi nümayəndəsi Stiv Vitkoff və İranın xarici işlər naziri Abbas Əraqçi ilə telefon danışığı aparıb.
Crossmedia.az-ın xarici KİV-lərə istinadən verdiyi məlumata görə, Misir Xarici İşlər Nazirliyinin açıqlamasında bildirilib ki, Əbdüləti hər iki tərəflə söhbət zamanı Yaxın Şərqdə gərginliyin azaldılması, diplomatik və siyasi həll yollarının önə çəkilməsinin vacibliyini vurğulayıb.
O, İsrail və İran arasında dərhal atəşkəsin əldə olunmasının və dialoqun bərpasının zəruriliyini qeyd edib.
Nazir bildirib ki, bölgədə davam edən böhranların hərbi yolla həlli mümkün deyil və münaqişənin genişlənməsi region üçün fəlakətli nəticələrə səbəb ola bilər:
“Tərəflər sülh prosesinə qayıtmalı və İranın nüvə proqramı ilə bağlı davamlı razılaşmanın əldə olunması üçün səyləri artırmalıdırlar”.
Qeyd edək ki, iyunun 13-də İsrail İranın müxtəlif şəhərlərində yerləşən nüvə obyektləri və hərbi qərargahları hədəfə alan irimiqyaslı hava əməliyyatlarına başlayıb. Hədəflər arasında İranın Baş Qərargah rəisi, İnqilab Keşikçiləri Korpusunun komandiri və digər yüksək rütbəli zabitlər yer alıb.
İran rəsmilərinin məlumatına görə, hücumlar nəticəsində 9 nüvə alimi də daxil olmaqla yüzlərlə insan həlak olub. Ümumilikdə 224 mülki və hərbi şəxsin öldüyü bildirilir.
İsrailin hücumlarına cavab olaraq İran ballistik raketlərlə bir sıra hədəfləri vurub. Cavab zərbələri nəticəsində 24 nəfərin həlak olduğu açıqlanıb.
Aybəniz Səfərova
02:26 18.06.2025
Oxunuş sayı: 8356
