İrandan vətəndaşlara xəbərdarlıq: "İsrail telefon vasitəsilə hədəfi müəyyən edir"
İran hökuməti vətəndaşlarına kibertəhlükəsizliklə bağlı təcili xəbərdarlıq edib.
Crossmedia.az xəbər verir ki, rəsmi qurumlar İsrailin son hücumları zamanı mobil telefonların izlənməsindən istifadə etdiyini bildirərək, əhaliyə WhatsApp, Telegram və digər məkan əsaslı tətbiqlərdən istifadə etməməyi tövsiyə ediblər.
İran rəsmiləri vətəndaşları hərbi və strateji obyektlərə yaxınlaşmazdan əvvəl mobil cihazlarını söndürməyə çağırıb.
“İnsanlar mobil telefonlarını həssas yerlərə aparmaqdan çəkinməlidir. Xüsusilə strateji və təhlükəsizlik orqanlarında çalışan şəxslər yalnız təhlükəsiz rabitə vasitələri və proqram təminatından istifadə etməlidirlər”, - hökumət nümayəndələri vurğulayıb.
İranın Kibertəhlükəsizlik Komandanlığı açıqlamasında İsrailin İranın rəqəmsal infrastrukturuna qarşı genişmiqyaslı kiberhücum kampaniyasına başladığını qeyd edib.
Bildirilib ki, bu hücumlar onlayn xidmətlərin fəaliyyətinə mane olmaq məqsədi daşıyır, lakin əksəriyyəti uğurla dəf edilib.
Bundan əlavə, bu gün səhər saatlarında İranın ən böyük maliyyə institutlarından biri olan Bank Sepah kiberhücumla üzləşib.
Hücuma görə məsuliyyəti İsraillə əlaqəli olduğu iddia edilən haker qrupu öz üzərinə götürərək, “Bank Sepah-ın bütün məlumatlarını məhv etdik” bəyanatı yayıb.
İran tərəfi hücumların miqyasını və nəticələrini araşdırdığını və müvafiq qarşı tədbirlərin davam etdirildiyini açıqlayıb.
Aybəniz Səfərova
23:47 17.06.2025
Oxunuş sayı: 6179
