Ayfon 14-də xoşagəlməz problem: "Apple" ödənişsiz təmir edəcək
"Apple" Ayfon 14 Plus modelinin bəzi istehsal partiyalarında aşkar edilən kamera probleminə həll gətirmək üçün yeni bir təmir proqramı elan edib. Ödənişsiz həyata keçiriləcək bu proqram çərçivəsində kameradakı problem aradan qaldırılacaq.
Şirkət müəyyən Ayfon 14 Plus modellərində aşkar edilən arxa kamera çatışmazlığını həll etmək məqsədilə təmir proqramı başlatdığını açıqlayıb. 10 aprel 2023 - 28 aprel 2024 tarixləri arasında istehsal edilən ayfon 14 Plus cihazlarının arxa kamerasında önizləmə görüntüsünün yaranmaması kimi bir problem olduğu bildirilib. Şirkət problemin texniki avadanlıqdan qaynaqlandığını və bu çərçivədə ödənişsiz təmir xidməti təklif edəcəyini qeyd edib.
Telefon istifadəçiləri cihazlarının bu proqram daxilində olub-olmadığını yoxlamaq üçün "Apple"ın dəstək səhifəsinə daxil olaraq cihaz seriya nömrələrini təsdiq edə bilərlər. Təmir proqramına uyğun olan cihazlardakı kamera problemi "Apple" və ya səlahiyyətli təmir mərkəzləri tərəfindən ödənişsiz olaraq həll ediləcək. Problemin həlli üçün əvvəllər ödəniş edən istifadəçilər ödənişin geri qaytarılmasını tələb edə biləcəklər.
Xidmət proqramı Ayfon 14 Plus modelini ilk satış tarixindən üç il müddətində əhatə edir. Bu da Apple-ın son illərdə Ayfon və "AirPods" modellərində üzə çıxan problemləri aradan qaldırmaq üçün göstərdiyi dəstəyi əks etdirir.
Bu problem əslində, Ayfon 14 Plus istifadəçiləri üçün ciddi narahatlıq doğururdu. Kameranın önizləməsinin olmaması, şəkil və video çəkməyi çətinləşdirirdi.
Emil Bağızadə
16:06 02.11.2024
Oxunuş sayı: 8559
