İdman
"Müstəqil bayrağımızı ucaltmaq başqa ləzzətdir!" – Əfsanəvi cüdoçumuzdan zəfər şərhi
Sarayevo şəhərində keçirilən veteran cüdoçular arasında Avropa Çempionatında Azərbaycan idman tərzi növbəti dəfə zirvəyə yüksəlib. M8 yaş kateqoriyasında 90 kq çəki dərəcəsində mübarizə aparan əfsanəvi cüdoçumuz Fərhad Rəcəbli bütün rəqiblərinə qalib gələrək qitə birinciliyinin növbəti qızıl medalına sahib olub. Bu möhtəşəm zəfərlə 12 qat dünya çempionu olan cüdo ustası eyni zamanda 12-ci dəfə Avropa çempionu titulunu qazanaraq dünya idman tarixinə misilsiz bir rekord yazdırıb. Oktyabrın 25-dək davam edəcək və Azərbaycanın 15 idmançı ilə təmsil olunduğu qitə birinciliyində Fərhad Rəcəblinin bu zəfəri təkcə fiziki gücün deyil, yarım əsrlik yenilməz peşəkar ruhi iradənin təcəssümünə çevrilib.
Qələbəsi barədə Crossmedia.az-a açıqlama verən veteran cüdoçu Fərhad Rəcəbli uşaqlıqdan qanında olan liderlik hissini, 1973-cü ildən bəri kəsilməyən məşq sistemini və bayrağımızı ucaltmağın verdiyi misilsiz hissləri belə şərh edib:
"Ümumiyyətlə, məndə uşaqlıqdan – hələ cüdo ilə 1973-cü ildən məşğul olmağa başlamazdan öncə də həmişə birinci olmaq, liderlik etmək həvəsi var idi. Nə iş görürəmsə, mütləq birinci olmağı sevmişəm və bu, mənim xarakterimə oturub. Cüdo ilə məşğul olmağa başlayandan sonra bu idman növü qanımdakı o liderlik keyfiyyətini daha da inkişaf etdirdi. Əgər bir işlə məşğul olursansa, mütləq qalib gəlməlisən. Əlbəttə ki, həmişə alınmırdı, amma çox vaxt alınırdı. Mən təkcə nəyin bahasına olursa-olsun qalib gəlməyi deyil, estetik, gözəl fəndlərlə, xalis cüdo nümayiş etdirərək təmiz qələbə qazanmağı sevmişəm. Zaman göstərdi ki, özümə ən uyğun idman növünü seçmişəm".
Əfsanəvi titulların sahibi böyük idmandan sonra məşqçilik fəaliyyətindən və müstəqil Azərbaycanın bayrağını dalğalandırmağın qürurundan danışıb:
"Böyük idmanı tərk edəndən sonra müəllimlik etdim, indi də məşqçiliyimi davam etdirirəm. Amma məşqçilikdən çox özümü idmançı kimi daha rahat hiss edirəm. Yaşın da öz sözünü dediyini, insan orqanizmindəki dəyişiklikləri nəzərə almaq lazımdır. Mənim gənclik illərim sovet dövrünə düşmüşdü. Amma indi şükürlər olsun ki, müstəqil dövlətik! Müstəqil dövlətimizin bayrağını ucaltmaq, himnimizi səsləndirmək xüsusi bir ləzzətdir, böyük fəxrdir. Hər yarışda bu hissi həm özüm yaşamağa, həm də zaldakılara yaşatmağa çalışıram".
Fərhad Rəcəbli uğurun qızıl formulunu və yarım əsrlik ardıcıl məşq rejimini vurğulayaraq fikrini yekunlaşdırıb:
"Kişilər qədimdən döyüşkən olublar; vaxtilə ova gediblər, döyüşüblər. Cüdo da bir döyüş növüdür və bizim döyüşkən kişi ruhumuzu canlı saxlamağa imkan verir. Qələbənin sirri isə sadə, amma çoxları üçün çətindir: sadəcə fasiləsiz məşq etmək! Mən 1971-1972-ci illərdə sambo, 1973-cü ildən bu yana isə cüdo praktikamı bir gün də olsun dayandırmamışam. Məşq edərkən də kor-koranə yox, düşünülmüş, planlı şəkildə, hər bir yaşa, mövsümə və yarışa uyğun proqramla hazırlaşırıq. Qalibiyyətə gətirən yeganə doğru yol budur və biz bu gün də onun bəhrəsini görürük".
Zeynəb Həsən
19:00 24.10.2026
Oxunuş sayı: 85
