Netanyahudan qalmaqallı bəyanat: “Qəzzanın hər qarışına nəzarət edəcəyik”
İsrailin Baş naziri Benyamin Netanyahu ölkəsinin Qəzza zolağının bütün ərazisinə hərbi nəzarət qurmaq niyyətində olduğunu açıqlayıb. Bu bəyanat “Gideonun Arabaları” adlı genişmiqyaslı əməliyyatın gedişi fonunda səsləndirilib.
Crossmedia.az xarici mediaya istinadən bildirir ki, Netanyahu Qəzzadakı hərbi əməliyyatların əsas məqsədinin dəyişmədiyini – HƏMAS hərəkatının məhv edilməsi və bölgədə saxlanılan israilli girovların azad olunması olduğunu vurğulayıb.
İsrail hökumət başçısı həmçinin qeyd edib ki, yaxın günlərdə ABŞ-la birgə Qəzzada humanitar yardımın bölgə əhalisinə çatdırılması üçün paylayıcı mərkəzlər yaradılacaq. Məqsəd, yardımların HƏMAS üzvlərinin əlinə keçməsinin qarşısını almaq və mülki əhaliyə dəstək olmaqdır.
“Bu, HƏMAS-ın tamamilə məhv edilməsi prosesinin bir hissəsidir. Biz güclü hərbi təzyiqlə, genişmiqyaslı hücumla Qəzzaya tam nəzarət etməyi və HƏMAS-ın humanitar yardımı talan etməsinin qarşısını almağı planlaşdırırıq. Bu həm bizim hərbi strategiyamız, həm də qələbə planımızdır”, – deyə Netanyahu bildirib.
O, həmçinin əlavə edib ki, hazırda İsrail ordusu Qəzzada “çox böyük, intensiv və güclü” əməliyyatlar həyata keçirir: “Biz sektorun hər bir nöqtəsinə nəzarət edəcəyik. Planımız budur və onu həyata keçirəcəyik”.
Qeyd edək ki, son günlərdə İsrailin Qəzzada həyata keçirdiyi hərbi əməliyyatlar daha da şiddətlənib və bu, beynəlxalq ictimaiyyət tərəfindən narahatlıqla izlənir.
Zəhra Ağayeva
18:30 19.05.2025
Oxunuş sayı: 8933
