Tramp Kamala Harrisi qanunsuz ödənişlərdə ittiham etdi
ABŞ prezidenti Donald Tramp keçmiş vitse-prezident Kamala Harrisə qarşı ciddi ittihamlar irəli sürüb. O, Harrisin məşhurlara seçki kampaniyasında iştirak etmələri üçün qanunsuz ödəniş etdiyini bildirib və bu məsələnin araşdırılmasını tələb edib.
Tramp Truth Social platformasında yazdığı paylaşımda Kamala Harrisin amerikalı müğənni Bryus Sprinqstinə “zəif çıxışına görə” nə qədər pul ödədiyini sorğulayıb. “Əgər o, Kamalanın bu qədər tərəfdarıdırsa, nəyə görə pul aldı? Bu, qeyri-qanuni kampaniya ianəsi deyilmi?” – deyə Tramp bildirib.
Crossmedia.az xarici mediaya istinadən bildirir ki, Tramp yalnız Bryus Sprinqstinlə kifayətlənməyib, həmçinin müğənni Beyons, televiziya aparıcısı Opray Uinfri və irlandiyalı musiqiçi Bono kimi tanınmış şəxslərin də Harrisdən ödəniş alıb-almadıqlarını gündəmə gətirib. O, bu iddialarla bağlı ciddi istintaqın aparılmasını tələb edib.
ABŞ mediası bildirir ki, bu açıqlama 2024-cü il prezident seçkiləri öncəsi Respublikaçılar və Demokratlar arasında gərginliyin artdığı bir vaxta təsadüf edir. Qeyd edək ki, Kamala Harris ötən il Demokratların namizədi kimi çıxış etmişdi və məşhurların dəstəyi onun kampaniyasının mühüm hissəsini təşkil etmişdi.
Ekspertlərin fikrincə, Trampın bu iddiaları həm siyasi təzyiq xarakteri daşıyır, həm də onun öz kampaniyasını gücləndirmək məqsədi güdür.
Zəhra Ağayeva
13:50 19.05.2025
Oxunuş sayı: 10061
