İsrail Qəzzada quru əməliyyatını genişlətdi, məhdud humanitar yardıma icazə verəcəyini açıqladı
İsrail Baş naziri Benyamin Netanyahu ordunun tövsiyəsinə əsaslanaraq Qəzzada quru əməliyyatlarını genişlətdiklərini və bölgəyə “əsas miqdarda” yardımın daxil olmasına icazə veriləcəyini bildirib. Bu qərarın “intensiv döyüşləri davam etdirmək üçün əməliyyat zərurəti” ilə əlaqədar olduğu qeyd edilib.
Crossmedia.az xarici mediaya istinadən bildirir ki, Qəzzaya üç aydır tətbiq edilən blokada nəticəsində 500 min insan “faciəvi” səviyyədə aclıqla üzləşib, bir milyona yaxın insan isə yalnız sağ qalacaq qədər qida ilə kifayətlənir. Bazar günü İsrailin hücumları nəticəsində 100-dən çox fələstinli həyatını itirib, əsas səhiyyə mərkəzlərindən biri – İndoneziya Xəstəxanası fəaliyyətini dayandırıb.
İsrail yardımın Qəzzaya necə və nə vaxt daxil olacağı barədə konkret məlumat verməyib. Netanyahu HƏMAS-ın yardımları nəzarətə götürməməsi üçün tədbirlər görüləcəyini deyib. İsrailin hazırkı hücumu martdan bu yana həyata keçirdiyi ən böyük hərbi əməliyyat sayılır və məqsəd torpaq nəzarəti ilə yanaşı əhalini kütləvi şəkildə köçkün salmaqdır.
Eyni zamanda atəşkəs danışıqları davam edir. İsrail HƏMAS-a girovların azad olunacağı, lakin müharibənin bitməyəcəyi müvəqqəti razılaşma təklif edir. HƏMAS isə İsrail ordusunun bölgədən tam çıxarılmasını və qalıcı sülhün əldə olunmasını tələb edir. Qətərdə aparılan danışıqlarda 58 girovun azadlığı və HƏMAS-ın Qəzzadan çıxarılması da daxil olmaqla razılaşma imkanları müzakirə olunur.
7 oktyabr 2023-cü ildə HƏMAS-ın hücumları ilə başlayan müharibə nəticəsində indiyədək 50 mindən çox fələstinli (əksəriyyəti qadın və uşaq) həlak olub. İsrail tərəfi isə 856 hərbçisini itirib. İsraildə də müharibəyə qarşı narazılıq artır, bəzi vətəndaşlar hərbi xidmətə getməkdən imtina edir, digərləri isə girovların azad olunması və müharibənin dayandırılması tələbilə mitinqlər keçirir.
Fatimə Nəbiyeva
12:35 19.05.2025
Oxunuş sayı: 7521
