Xarici xəbərlər
Kapitan İbrahim Traore dünya miqyasında məşhur liderə çevrilib
Burkina Fasonun hərbi rəhbəri Kapitan İbrahim Traore, 2022-ci ildə hakimiyyəti ələ keçirdikdən sonra pan-Afrikaçı ideyaları ilə yalnız öz ölkəsində deyil, bütün qitədə və dünya miqyasında tanınan bir simaya çevrilib.
Crossmedia.az xarici mediaya istinadən xəbər verir ki, 37 yaşlı Traore, özünü keçmiş lider və marksist inqilabçı Tomas Sankaranın davamçısı kimi təqdim edərək, anti-imperialist çıxışları və sərt qərarları ilə diqqət mərkəzinə düşüb. O, Afrika liderlərinə "imperialistlərin ipini çəkdiyi zaman oynayan kuklalar kimi davranmağı dayandırmağı" çağırıb və Qərblə münasibətləri kəsərək Rusiya ilə güclü ittifaq qurub.
Traorenin populyarlığına baxmayaraq, o, daxildə ciddi tənqidlərə də məruz qalır. Müxalifətə qarşı sərt tədbirlərlə yanaşı, 10 ildir davam edən islamçı üsyanı yatırmaq vədini hələ yerinə yetirə bilməyib.
Bununla belə, o, iqtisadi sahədə müəyyən irəliləyişlərə nail olub. Ölkədə daxili gəlirlər artırılıb, yoxsulluq səviyyəsi iki faiz bəndi azaldılıb və təhsil, səhiyyə və sosial müdafiə sahələrinə ayrılan vəsaitlərdə artım müşahidə olunub.
Kapitan Traore hazırda Afrikada yeni nəsil liderlərin simvolu kimi təqdim olunur və onun çıxışları sosial şəbəkələrdə geniş yayılaraq xüsusilə gənclər arasında böyük dəstək qazanır.
Zeynəb Yunuszadə
16:55 12.05.2025
Oxunuş sayı: 17801
