ABŞ-İran danışıqları: Dördüncü turun tarixi müəyyənləşdi
ABŞ ilə İran arasında aparılan dolayı danışıqların dördüncü turunun keçiriləcəyi tarix bəlli olub. İran danışıqlar heyətindən bir nümayəndə bildirib ki, Oman xarici işlər naziri Bədr bin Hamed əl-Busaidinin danışıqların bazar günü keçirilməsi ilə bağlı təklifinə Tehran müsbət cavab verib. Danışıqların Oman ərazisində keçiriləcəyi rəsmən təsdiqlənib.
Crossmedia.az İranlı nümayəndənin sözlərinə istinadən xəbər verir ki, bu turda müzakirələr yalnız nüvə sahəsində və İrana qarşı tətbiq olunan sanksiyaların ləğvi mövzusunda aparılacaq.
Əvvəllər dördüncü turun 3 may şənbə günü keçirilməsi planlaşdırılsa da, logistika və texniki səbəblərlə təxirə salınmışdı.
ABŞ-İran danışıqları qarşılıqlı inamın qurulması və daha sonra İranın nüvə proqramı ilə bağlı razılaşma çərçivəsinin yaradılması məqsədi daşıyır. ABŞ, İranın yüksək səviyyədə zənginləşdirilmiş uran istehsalını dayandırmasını istəyir. İran isə nüvə proqramının yalnız dinc məqsədlər daşıdığını bildirir və sanksiyaların ləğvi müqabilində bu proqramı “məhdudlaşdırmağa” hazır olduğunu, lakin ABŞ-nin öz öhdəliklərindən geri çəkilməyəcəyinə dair zəmanət tələb etdiyini vurğulayır.
Eyni zamanda, İranın uran zənginləşdirmə sentrifuqlarını sökmək, zənginləşdirmə fəaliyyətini tam dayandırmaq və zənginləşdirilmiş uran ehtiyatını 2015-ci il razılaşmasında nəzərdə tutulan səviyyələrin altına salmaq niyyətində olmadığı bildirilir.
Mədinə Cəlilova
21:47 09.05.2025
Oxunuş sayı: 8868
