İsrail mətbuatı: Tramp Netanyahu ilə əlaqəni kəsib
İsrail Ordu Radiosunun məlumatına görə, ABŞ Prezidenti Donald Tramp İsrail Baş naziri Benyamin Netanyahu ilə əlaqəni kəsmək qərarı verib.
Crossmedia.az xəbər verir ki, bu məlumatı radio müxbiri Yanir Cozin X platformasında paylaşıb. Onun sözlərinə görə, Tramp bu qərarı Netanyahu tərəfindən manipulyasiya edildiyinə dair şübhələr səbəbindən qəbul edib.
İsrailli bir rəsmi Cozinə bildirib ki, strateji işlər naziri Ron Dermerin Trampa nə etməli olduğunu söyləməyə çalışan “kobud” çıxışları nəticə verməyib. Həmin rəsmi əlavə edib ki, Tramp ətrafındakı insanlardan Netanyahunun onu yönləndirməyə çalışdığı barədə məlumat alıb. “Tramp üçün ən dözülməz şey, ‘axmaq’ və ‘oyun aləti’ kimi göstərilməkdir. Buna görə də Netanyahu ilə əlaqəni kəsməyə qərar verdi”, - deyə qeyd olunub.
Cozin həmçinin Vaşinqtonla Təl-Əviv arasında münasibətlərin soyumasının əsas səbəblərindən biri kimi İsrailin İran və Husilər mövzusunda konkret plan və zaman cədvəli təqdim etməməsini göstərib. O, Netanyahu hökumətinin Qəzza məsələsində də real təkliflərlə çıxış etmədiyini vurğulayıb.
Digər tərəfdən, ABŞ-nin İsraildəki səfiri Mayk Hakabi bildirib ki, ABŞ, Yəməndəki Husilərlə razılaşma əldə etmək üçün İsraildən icazə almağa ehtiyac duymur. Kanal 12-yə verdiyi müsahibədə Hakabi qeyd edib ki, əgər Husilər İsrailə hücum edərkən amerikalılara zərər verərlərsə, bu zaman ABŞ məsələyə müdaxilə edəcək.
Hakabi həmçinin ABŞ Prezidenti Tramp və vitse-prezident JD Vance ilə bu məsələni müzakirə etdiyini bildirib. Onun sözlərinə görə, “İsraildə 700 min amerikalı yaşayır. Əgər Husilər onlara zərər verməyə davam etsələr, bu artıq bizim işimiz olar”. Kanal 12-nin jurnalistinin sualına cavab olaraq səfir bildirib ki, bu, “ABŞ-nin prioritetlərinin nədən ibarət olacağı ilə bağlı məsələdir”.
Mədinə Cəlilova
21:08 09.05.2025
Oxunuş sayı: 8712
