PKK silahlı mübarizəni dayandıra və özünü buraxa bilər
Kürd Fəhlə Partiyası (PKK) yaxın günlərdə Türkiyəyə qarşı silahlı mübarizəni dayandırdığını və özünü buraxdığını elan edə bilər. Bu barədə Middle East Eye nəşri mənbələrə istinadən məlumat yayıb.
Crossmedia.az xarici mediaya istinadən bildirir ki, 5-7 may tarixlərində PKK-nın qurultayı keçirilib və burada təşkilatın həbsdə olan lideri Abdullah Öcalanın müraciəti müzakirə olunub. Həmin müraciətdə Öcalan təşkilatı 40 ildən çox əvvəl başladığı silahlı mübarizəni dayandırmağa çağırıb.
PKK qurultayda “tarixi əhəmiyyət daşıyan qərarların” qəbul edildiyini və bu qərarların yaxın vaxtlarda rəsmi sənədlərlə birlikdə ictimaiyyətə açıqlanacağını bildirib.
Öcalan fevralda yaydığı müraciətində silahlı mübarizəni köhnəlmiş üsul adlandırmış və Türkiyə hökumətinin son islahatları ilə yanaşı regionda baş verən dəyişikliklərin bu cür mübarizəni mənasız etdiyini vurğulamışdı. O, bütün kürd silahlı qruplarına silahı yerə qoymağı, PKK-nın isə fəaliyyətinə son verməsini tövsiyə etmişdi. Bu çağırış yalnız PKK-ya deyil, həmçinin Suriyada, İranda və İraqda fəaliyyət göstərən KCK (Kürdistan Cəmiyyətlər Birliyi) quruluşlarına da aid edilib.
Mart ayında PKK Öcalanın çağırışına cavab olaraq rəsmi şəkildə atəşkəs elan edib. Hazırda gözlər təşkilatın yaxın günlərdə verəcəyi yekun qərara yönəlib.
Fatimə Nəbiyeva
18:34 09.05.2025
Oxunuş sayı: 1296
