Ümummilli Liderin dövlətçilik strategiyası: Tarixi təməl, davamlı yüksəliş
Azərbaycan Respublikasının müasir tarixi dərin ictimai-siyasi transformasiyalarla müşayiət olunub. Bu proseslərin mərkəzində dayanan və ölkənin taleyüklü dönəmlərində həlledici rola sahib olan şəxsiyyət, şübhəsiz ki, ümummilli lider Heydər Əliyevdir. Onun milli maraqlara əsaslanan, strateji baxışa və qabaqlayıcı liderlik qabiliyyətinə söykənən dövlətçilik kursu Azərbaycanın 1990-cı illərin ağır sınaqlarından çıxaraq sabit, güclü və nüfuzlu bir dövlətə çevrilməsinə zəmin yaratdı.
Bu gün Azərbaycanın enerji strategiyası, iqtisadi müstəqilliyi, beynəlxalq nüfuzu və qeyri-neft sektorundakı uğurlu transformasiyası məhz Heydər Əliyevin siyasi irsinin məntiqi davamı olaraq dəyərləndirilir.
1994-cü il 20 sentyabr tarixində imzalanmış “Əsrin müqaviləsi” təkcə enerji sahəsində deyil, ümumilikdə Azərbaycan dövlətçiliyində dönüş nöqtəsi oldu. Bu sənəd ölkənin zəngin enerji ehtiyatlarının qlobal bazarlara çıxarılması üçün beynəlxalq əməkdaşlığa yol açdı. Həmin dövrdə regionda sabitlik zəif, investisiya mühiti isə qeyri-müəyyən idi. Lakin Heydər Əliyevin siyasi iradəsi və diplomatik bacarığı nəticəsində “BP”, “Statoil” kimi transmilli korporasiyalar Azərbaycan iqtisadiyyatına sərmayə yatırmağa razı oldular.
Bu müqavilənin nəticəsi olaraq 2006-cı ildə Bakı-Tbilisi-Ceyhan (BTC) əsas neft ixrac boru kəməri, 2007-ci ildə isə Bakı-Tbilisi-Ərzurum qaz kəməri istifadəyə verildi. Nəticədə Azərbaycan 2020-ci illərdə Avropanın enerji təhlükəsizliyində əsas strateji tərəfdaşlardan birinə çevrildi.
Heydər Əliyevin neft gəlirlərinin məqsədyönlü və səmərəli istifadəsinə dair çağırışı bu gün Prezident İlham Əliyev tərəfindən ardıcıl şəkildə həyata keçirilir.
1993-cü ildə xalqın tələbi ilə yenidən hakimiyyətə qayıdan Heydər Əliyev ilk növbədə ölkədə konstitusion sabitliyi bərpa etdi. 1995-ci ildə qəbul edilən Konstitusiya hüquqi dövlət quruculuğunun təməlini qoydu. Paralel olaraq hüquq-mühafizə orqanlarında islahatlar aparıldı, milli təhlükəsizlik sistemləri yenidən quruldu, ordu quruculuğu prosesinə yeni mərhələ başlandı.
Bu gün Azərbaycanın beynəlxalq reytinqlərdə "ən sabit ölkələr" sırasında yer alması, Silahlı Qüvvələrinin regionda ən güclü ordulardan birinə çevrilməsi və işğaldan azad edilmiş ərazilərdə aparılan genişmiqyaslı bərpa-quruculuq işləri həmin sabitlik siyasətinin məntiqi nəticəsidir.
Heydər Əliyevin xarici siyasət fəlsəfəsi balanslaşdırılmış yanaşmaya əsaslanırdı. Qərb və Şərq arasında tarazlığı qorumaqla, Azərbaycanın milli maraqları maksimum səviyyədə təmin olunurdu. Bu gün Azərbaycan BMT, Qoşulmama Hərəkatı, İƏT, TÜRKPA və digər nüfuzlu beynəlxalq təşkilatlarda fəal iştirak edir. 2024-cü ildə ölkəmizin təşəbbüsü ilə COP29-un Bakıda keçirilməsi Azərbaycanın qlobal ekoloji gündəmdə liderliyinin göstəricisidir.
Azərbaycan-Çin, Azərbaycan-Türkiyə və Azərbaycan-Avropa İttifaqı münasibətləri strateji tərəfdaşlıq səviyyəsinə yüksəlib. Prezident İlham Əliyevin rəhbərliyi ilə həyata keçirilən xarici siyasət kursu, məhz ümummilli liderin əsasını qoyduğu strateji xəttin ardıcıl davamıdır.
Heydər Əliyev müasir Azərbaycanın siyasi memarı olaraq yalnız bir dövr üçün deyil, uzunmüddətli inkişaf, sabitlik və müstəqillik konsepsiyasını formalaşdırdı. Bu gün Azərbaycanın dayanıqlı iqtisadiyyatı, etibarlı tərəfdaş imici, müasir infrastruktur sistemi və güclü milli həmrəylik ruhu məhz həmin uzaqgörən siyasətin bəhrəsidir.
Ulu Öndərin dediyi kimi:
“Müstəqil Azərbaycan dövləti əbədi yaşayacaq!”
Bu əminlik bu gün hər sahədə öz təsdiqini tapır.
Əsli Telmanqızı
14:55 09.05.2025
Oxunuş sayı: 1150
