Zelenski: “Hər bir şərin bir sonu var”
Ukrayna Prezidenti Volodimir Zelenski "Nasizm üzərində Qələbə Günü” münasibətilə Kiyevin mərkəzindən video müraciət yayımlayıb. O, müraciətində ölkəsinin keçdiyi çətin dövrlərə toxunaraq, işğalçı güclərin bu torpaqlarda yerinin olmadığını bildirib.
Crossmedia.az xarici mediaya istinadən bildirir ki, Zelenski çıxışında “24 fevral səhəri Xreşatik küçəsi bomboş idi — nə maşın, nə də insan var idi. Amma indi bura yenidən canlanıb, bunu görürsünüz. Üç il əvvəl Müstəqillik Günü çıxışımı burada çəkmişdim. O zaman küçədə yanan Rusiya texnikası dayanmışdı. Şərin bu torpaqlarda edə biləcəyi yeganə parad bu idi,” sözlərini deyib.
Zelenskinin paylaşımı Moskvada keçiriləcək Qələbə Günü paradı öncəsi görülən təhlükəsizlik tədbirləri ilə kəskin ziddiyyət təşkil edir. Rusiya paytaxtında Ukraynadan gələn pilotsuz uçuş aparatları (PUA) hücumları səbəbindən ciddi tədbirlər görülüb. Şəhər çoxqatlı hava hücumundan müdafiə sistemi ilə qorunur.
Moskva hava limanlarında cümə axşamı yeni hücum olmasa da, 100-dən çox uçuş təxirə salınıb. Rusiya Tur Operatorları Assosiasiyasının məlumatına görə, Türk Hava Yolları demək olar ki, Vnukovo hava limanına olan bütün uçuşları ləğv edib.
Kremlin Qələbə Günü ilə əlaqədar şəhər mərkəzində mobil rabitə və internetə məhdudiyyət tətbiq olunacağını açıqlayıb. Kremlin sözçüsü Dmitri Peskov bu addımı “təhlükəli qonşular” səbəbilə atdıqlarını və tədbirlərin 10 mayadək davam edə biləcəyini bildirib. O, tədbirin lazımınca keçirilməsinin vacib olduğunu vurğulayıb. Kremlin məlumatına görə, parad üçün 29 dünya lideri, o cümlədən Çin və Braziliya prezidentləri Moskvaya dəvət olunub. Avropadan yalnız Serbiya Prezidenti Aleksandar Vuçiç və Slovakiya Baş naziri Robert Fico tədbirdə iştirak edəcək.
Fatimə Nəbiyeva
16:53 09.05.2025
Oxunuş sayı: 11236
