Trampın Çinlə ticarət siqnalları ABŞ bazarlarını canlandırdı
ABŞ Prezidenti Donald Trampın Çinlə “əsaslı” ticarət danışıqları aparılacağını bildirməsi və gömrük tariflərinin azaldıla biləcəyini deməsi investorların riskli aktivlərə marağını artırıb. ABŞ dolları və fond bazarları son bir ayın ən yüksək səviyyələrinə çatıb. Tramp, “gömrük rüsumları düşə bilər” deyərək, danışıqlardan nikbin olduğunu bildirib. ABŞ və Çin rəsmilərinin həftəsonu İsveçrədə görüşəcəyi gözlənilir.
Crossmedia.az xarici mediaya istinadən bildirir ki, Trampın açıqlamaları və ticarət gərginliyinin azalması ABŞ aktivlərinə marağı artırıb. Aprel ayında resessiya qorxularına görə dəyər itirən bazarlar, Trampın tarifləri azalda biləcəyinə dair siqnalları ilə yenidən yüksəlişə başlayıb. Prezidentin İngiltərə ilə ticarət razılaşması və yeni vergi qanunu da bazar üçün stimullaşdırıcı faktor kimi qiymətləndirilir.
ABŞ birjaları artan risk iştahı fonunda cümə axşamı yüksəlib. Dow Jones sənayə indeksi 0,62%, S&P 500 0,58%, Nasdaq isə 1,07% dəyər qazanıb. Avropa indeksləri daha yaxşı nəticə göstərərək rekord səviyyələrə yaxınlaşıb. Asiya bazarlarında isə investorların ehtiyatlı davranışı səbəbilə qarışıq mənzərə yaranıb.
Valyuta bazarlarında ABŞ dolları güclənib, dollar indeksi 100 bəndini keçib. Bu vəziyyət avro başda olmaqla digər aparıcı valyutalara təzyiq yaradıb. EUR/USD məzənnəsi 1,12 səviyyəsinə geriləyərək son bir ayın minimumuna düşüb.
Qızıl qiymətləri risk iştahının artması səbəbilə geriləyib, neft və Bitcoin isə yüksəlib. COMEX-də qızıl 2,5% ucuzlaşaraq 3.318 dollara düşüb. Brent nefti 63 dolları keçib. Bitcoin isə 6,3% bahalaşaraq 103 min dolları aşaraq son üç ayın ən yüksək səviyyəsinə çatıb.
Fatimə Nəbiyeva
14:22 09.05.2025
Oxunuş sayı: 891
