Deputat: “Hindistan aqressor ölkə kimi davranır”
Bu günlərdə Hindistanın Pakistanın sərhəd bölgələrinə hərbi hücum etməsi bölgədə vəziyyəti daha da gərginləşdirib. Gərginlik, xüsusilə Kəşmir və Jammu bölgəsində toqquşmaların artması ilə müşayiət olunur. Rəsmi İslamabad Hindistanın bu addımını beynəlxalq hüququn pozulması kimi qiymətləndirib və BMT-yə müraciət edib. Münaqişənin genişlənməsi ehtimalı regionda və beynəlxalq aləmdə ciddi narahatlıq doğurur.
Deputat Hikmət Babaoğlu Crossmedia.az-a Hindistanın Pakistana qarşı olan aqressiyası və hücumu ilə bağlı açıqlama verib.
Hikmət Babaoğlu Hindistanın həm qonşu ölkələrə qarşı siyasətini, həm də ölkə daxilində yaşayan müsəlmanlara qarşı münasibətini sərt tənqid edib.
Millət vəkili bildirib ki, Hindistan bu gün aqressor dövlət kimi çıxış edir, qonşu ölkələrin ərazilərinə hücum edir, beynəlxalq hüququ pozur və eyni zamanda, Hindistanda yaşayan müsəlmanlara qarşı şaquli assimilyasiya siyasəti həyata keçirir. Onun sözlərinə görə, bu siyasət çərçivəsində müsəlmanlara qarşı dövlət dəstəkli zorakılıq və terror aktları həyata keçirilir.
“Əlbəttə ki, bütün bunlar beynəlxalq hüquqa, dövlətlərarası münasibətlərə, eləcə də Birləşmiş Millətlər Təşkilatının Kəşmir və Jammu ilə bağlı qəbul etdiyi qətnaməyə ziddir”, – deyə deputat vurğulayıb. O, xatırladıb ki, birinci Hindistan-Pakistan müharibəsindən sonra əldə edilən atəşkəs razılaşmasına əsasən, Kəşmir və Jammuda yaşayan müsəlmanların statusunun müzakirə olunması nəzərdə tutulurdu, lakin Hindistan bu öhdəliyi yerinə yetirməyib və BMT-nin mövqeyini rədd edib.
H.Babaoğlu, əlavə edib ki, hazırda Pakistan Hindistanın müsəlmanlara qarşı həyata keçirdiyi assimilyasiya və ayrı-seçkilik siyasətinə qarşı haqlı şəkildə etiraz edir. “Bu etiraza qarşı olaraq Hindistan müharibə ritorikasına və hərbi təhdidə əl atır”, – deyə o bildirib.
Onun sözlərinə görə, məsələyə Fransanın da silahlarla müdaxilə etməsi, mümkün bir müharibənin miqyasını daha da genişləndirə bilər. “Fransanın iştirakı bu bölgədə vəziyyəti daha da gərginləşdirir. Amma bu gün qlobal Cənub dünya siyasətində yeni parlayan ulduz kimi çıxış etməkdədir və bu prosesdə yeni güc balansının necə formalaşacağı bütün dünyanın diqqət mərkəzindədir”, – deyə Babaoğlu vurğulayıb.
Milli Məclisin deputatı qeyd edib ki, hadisələr daha da kəskinləşərsə, bu zaman yalnız Fransa və ABŞ deyil, Çin, Türkiyə və digər ölkələr də bu prosesə reaksiya verəcək. “Pakistanın yaxın müttəfiqləri olan bir çox ölkə bu məsələdə öz mövqeyini ortaya qoyacaq. Ona görə də Hindistan hələ gec deyil, bu mövqeyindən geri çəkilməli, ölkəsində yaşayan müsəlmanların hüquqlarını tanımalı və BMT qarşısında götürdüyü öhdəlikləri yerinə yetirməlidir”, – deyə deputat açıqlamasında vurğulayıb.
Fatimə Nəbiyeva
13:35 07.05.2025
Oxunuş sayı: 24154
