İran rəsmisi Şahid Rəcai limanındakı partlayışın arxasında xarici müdaxilənin olmadığını deyir
İran Məclisində (parlament) milli təhlükəsizlik komitəsinin üzvü İbrahim Rəzaei, Şahid Rəcai limanında baş vermiş partlayışla bağlı xarici müdaxilə və ya diversiya ehtimallarını rədd edib. O bildirib ki, hadisənin xarici qüvvələrin müdaxiləsi nəticəsində baş verdiyini sübut edən heç bir sənəd və ya hesabat yoxdur.
Crossmedia.az xarici mediaya istinadən bildirir ki, Rəzaei bu məsələyə dair açıqlamasında “Mənim bildiyimə görə, bu hadisənin xarici müdaxilə nəticəsində baş verdiyini göstərən heç bir dəlil yoxdur. İndiyədək bu barədə nə diversiya, nə də xarici agentlərin müdaxiləsi ilə bağlı bir hesabat görməmişəm,” – deyə vurğulayıb.
Parlament üzvü əlavə edib ki, baş verən partlayış ölkənin müdafiə sektoru və ya silahlı qüvvələrlə əlaqəli deyil. Onun sözlərinə görə, hadisə mülki sahəyə aiddir və hərbi strukturlarla heç bir əlaqəsi yoxdur.
Hazırda limanda vəziyyətin tədricən normallaşdığı, lakin bəzi yanğın ocaqları səbəbindən ərazidə hələ də tüstülənmənin davam etdiyi qeyd olunur. Rəzaeinin sözlərinə görə, partlayışın və ardınca baş verən yanğınların nəticələrinin tam aradan qaldırılması üçün iki-üç həftəyə ehtiyac olacaq.
Fatimə Nəbiyeva
14:49 30.04.2025
Oxunuş sayı: 7786
