İran-ABŞ müzakirələrinin üçüncü turu sona çatıb
İran və ABŞ arasında, Ummanın paytaxtı Maskatda keçirilən üçüncü tur nüvə müzakirələrinin başa çatdığı bildirilib. Umman Xarici işlər nazirliyi, iki ölkə arasında müzakirələrin 3 may tarixində davam etdiriləcəyini açıqlayıb.
Crossmedia.az xarici mediaya istinadən xəbər verir ki, bu gün səhər saatlarında başlayan görüşmələr yerli vaxtla 16:30-da yekunlaşıb. İran dövlət televiziyasının verdiyi məlumata görə, əvvəlki iki turda olduğu kimi, bu görüşlərdə də İran heyətinə Xarici İşlər naziri Abbas Ərakçi, ABŞ heyətinə isə Prezident Donald Trampın Yaxın Şərq üzrə xüsusi nümayəndəsi Stiv Vitkoff rəhbərlik edib.
Görüşmələr öncəsi verilən açıqlamalarda bildirilmişdi ki, Maskatda həm texniki səviyyədə, həm də yüksək səviyyəli diplomatik danışıqlar aparılacaq.
Umman Xarici işlər naziri Bədr bin Hamed əl-Busaidi “X” sosial şəbəkəsində verdiyi açıqlamada, ABŞ-İran danışıqlarında qarşılıqlı hörmətə və davamlı öhdəliklərə əsaslanan bir razılaşma əldə etmək üçün ortaq hədəf müəyyən edildiyini bildirib. Busaidi, danışıqlarda “əsas prinsiplər, hədəflər və texniki narahatlıqların” müzakirə edildiyini qeyd edib və gələn həftə görüşlərin davam etdiriləcəyini, 3 mayda isə yüksək səviyyəli toplantı planlaşdırıldığını əlavə edib.
Nazir, müzakirələrin dəqiq keçiriləcəyi yer barədə məlumat verməyib.
Xatırladaq ki, ABŞ Prezidenti Donald Tramp 2018-ci ildə ölkəsini İranla imzalanmış nüvə sazişindən birtərəfli qaydada çıxarmışdı. Bu ilin mart ayında Tramp, İran lideri Ayətullah Əli Xameneiyə birbaşa nüvə müzakirələrinə çağırış edən və təhdidlər ehtiva edən məktub göndərmişdi. İran isə bu məktuba Umman vasitəsilə cavab vermişdi.
Tərəflər 12 aprel tarixində Ummanda dolayısı görüşlər keçirmiş, 19 aprel tarixində isə İtaliyanın paytaxtı Romada yenidən Ummanın vasitəçiliyi ilə görüşmüşdülər. Hər iki tərəf, müzakirələrdə irəliləyiş əldə olunduğunu bəyan etmişdi.
Mədinə Cəlilova
19:05 26.04.2025
Oxunuş sayı: 8715
