Aİ liderləri Çinə səfər etməyə hazırlaşır
Avropa Komissiyasının rəhbəri Ursula fon der Lyayen və Avropa Şurasının yeni sədri Antoniu Koşta iyul ayının sonunda Pekinə səfər edərək Çin lideri Si Cinpinlə görüşməyi planlaşdırırlar.
Crossmedia.az xarici mediaya istinadən bildirir ki, bu barədə South China Morning Post nəşri məlumat yayıb. Məlumata görə, bu görüş Aİ və Çin arasında iki il ardıcıl olaraq Çin paytaxtında keçirilən nadir yüksək səviyyəli görüşlərdən biri olacaq. Halbuki bu cür sammitlər adətən iştirakçı tərəflərin paytaxtlarında növbə ilə baş tutur.
Aİ nümayəndələri son aylarda görüşün Brüsseldə keçirilməsini istəsələr də, Çin tərəfi Si Cinpinin 2025-ci ildə Avropaya səfər etməyi planlaşdırmadığını bildirib. Avropa rəsmiləri isə xatırladıblar ki, Çin lideri Moskvadan 80 illik Qələbə bayramında iştirak üçün dəvət qəbul edib.
Si Cinpinin Brüsselə getmək istəməməsi səbəbindən Koşta və fon der Lyayen şəxsi görüş üçün Pekinə səfəri qaçılmaz hesab ediblər.
Aİ rəhbərlərinin bu addımı Avropa İttifaqının Pekinlə münasibətləri canlandırmaq üçün göstərdiyi ciddi səyləri nümayiş etdirir. Bu, xüsusilə də Aİ-nin ABŞ ilə münasibətlərində gərginliklərin yaşandığı bir dövrə təsadüf edir.
Qeyd edək ki, səfərin dəqiq tarixi hələ müəyyən edilməyib. Həmçinin Çin tərəfi Avropa rəsmilərinin Si Cinpinlə deyil, Çin Dövlət Şurasının Baş naziri Li Çyanla görüşməsini daha məqsədəuyğun hesab etdiyini bildirib.
Zəhra Ağayeva
14:05 11.04.2025
Oxunuş sayı: 5457
