Azərbaycan Qlobal Cənubla Qlobal Şimal arasında körpülərin qurulmasında mühüm rol oynayır – DEPUTAT
ADA universitetində "Yeni dünya nizamına doğru" mövzusunda beynalxalq forum keçirilib Azərbaycanın beynəlxalq siyasətdəki rolu, regiondakı yeni reallıqlar və qlobal münaqişələr fonunda ölkənin gələcəyi geniş müzakirə olundu. Forumda iştirak edən Prezident İlham Əliyev Cənubi Qafqazda sülh və əməkdaşlığın yalnız Azərbaycan və Ermənistan arasında sülh sazişinin imzalanması ilə mümkün olacağını vurğuladı. O, Ermənistanın silahlanmasının regionda yeni gərginlik ocaqları yarada biləcəyi barədə xəbərdarlıq etdi və Qərb dairələrinin anti-Azərbaycan fəaliyyətinin nəticəsiz qalacağını bildirdi.
Prezident deyib: “Halbuki bizim hamımızın buna imkanı var idi. Ermənistan regionda reallaşan layihələrin bir hissəsi ola bilərdi. Lakin “Böyük Ermənistan” xülyası buna mane oldu. Cənubi Qafqazda əməkdaşlıq Azərbaycan və Ermənistan arasında sazişin imzalanmasından asılıdır. Yalnız belə olan halda Cənubi Qafqazı inteqrasiya olunmuş regiona çevirməyə cəhd etmək üçün heç bir maneə qalmayacaq”.
Milli Məclisin deputatı Nigar Məmmədova Crossmedia.az-a verdiyi açıqlamasında forumda Azərbaycanın yaratdığı yeni reallıqların dünyaya təqdim olunmasının əhəmiyyətini vurğuladı. O, Prezidentin bəyanatlarının regionda sülh və sabitliyin təmin olunması üçün mühüm mesajlar olduğunu qeyd etdi. Nigar Məmmədova, həmçinin, Azərbaycanın Qoşulmama Hərəkatına sədrliyi və COP29-a ev sahibliyi etməsinin ölkənin beynəlxalq nüfuzunu artırdığını və Qlobal Cənubla Qlobal Şimal arasında körpülərin qurulmasında mühüm rol oynadığını vurğuladı.
Deputat, Azərbaycanın Türk dünyası ilə əlaqələrinin də xüsusi əhəmiyyət kəsb etdiyini qeyd edərək, TDT-nin gücləndirilməsinin regionda əməkdaşlığın inkişafına töhfə verəcəyini bildirdi. O, Azərbaycanın Çin şirkətləri ilə fəal əməkdaşlığının da ölkənin iqtisadi inkişafında mühüm rol oynadığını vurğuladı. Deputat Prezident İlham Əliyevin “Yeni dünya nizamına doğru” mövzusunda beynəlxalq forumdakı çıxışı zamanı səsləndirdiyi sözlərə vurğu edib: “Onların şirkətləri yaşıl ictimai nəqliyyat vasitələrinin istehsalında bizim tərəfdaşdırlar. Artıq bu il yeni avtobuslar istifadəyə veriləcək və Günəş panelləri ki Azərbaycanda quraşdırılır, onlar Çin istehsalıdır. Eyni zamanda da biz bəzi Çin şirkətləri ilə də danışıqlar aparırıq ki, bilavasitə yaşıl enerji sahəsinə yatırımlar qoyulsun.”
Forumda Azərbaycan-ABŞ münasibətləri də müzakirə olundu və Prezident İlham Əliyev Azərbaycanın ABŞ üçün mühüm tərəfdaş ola biləcəyini bildirdi.
Nigar Məmmədova, bu münasibətlərin inkişafının regionda sabitliyin təmin olunmasında mühüm rol oynayacağını qeyd etdi.
18:53 10.04.2025
Oxunuş sayı: 3563
