İran - Ermənistan təlimlərinin pərdəarxası: Zəngəzur dəhlizi faktoru
Bu günlərdə İranla Ermənistan arasında növbəti hərbi təlimlər keçirilir. Təlimlərdə hər iki ölkənin Silahlı Qüvvələrinin xüsusi təyinatlı bölmələri iştirak edir.
Manevrlərlər Ermənistan-İran dövlət sərhədində yerləşən sərhəd-keçid məntəqələrinə şərti terrorçu qrupların hücumlarının zərərsizləşdirilməsi üzrə tədbirləri əhatə edir.
Tərəflər arasında indiyə qədər müxtəlif təlimlər keçirib. Bu dəfəki manevrlərin isə indiki gərgin məqamda nəyə hesablandığı sual doğurur.
Bu barədə Crossmedia.az-a danışan siyasi şərhçi, Orta Doğu Araşdırmalar Mərkəzinin rəhbəri Sədrəddin Soltan bildirib ki, hər iki ölkənin silahlı qüvvələrinin xüsusi təyinatlı bölmələri, müvafiq olaraq, Ermənistan və İran ərazisində təlimlər keçirəcək: "Hər iki tərəf bu tədbiri uzun müddətdir ki, planlaşdırırdı. Manevrlər İran və Ermənistan arasında sərhəd məntəqələrində Rusiya hərbiçilərinin ermənilərlə əvəzlənməsindən sonra reallaşır. Ermənistan İrana xoşməramlılıq nümayiş etdirir. Bir müddət əvvəl ABŞ-nin Ermənistana hərbi texnika yerləşdirməsi ilə bağlı xəbərlər yayılmışdı. Ermənistan İrana xoşməramlı olduğunu və ABŞ -dən hansısa təhdidin olmayacağını çatdırmaq istəyir. Həmçinin rəsmi İrəvan rəsmi Tehrana hərbi müdaxilənin öz ərazisindən edilməyəcəyinə dair zəmanət verir.
Müsahibimiz, həmçinin bildirdi ki, tərəflər Zəngəzur bölgəsində sözügedən təlimi keçirərək, həm də bu ərazidə hər iki tərəfin nəzarət imkanına malik olduğunu göstərmək istəyirlər: “Xüsusən İran Zəngəzur yolunu və Zəngəzur məsələsini özünün "qırmızı xətti" elan edərək, bu ərazidə istənilən vaxt müdaxilə edə biləcəyini nümayiş etdirmək istəyir. Onların sülhməramlı məsələsi mümkün deyil. Çünki Ermənistan ərazisində münaqişə yoxdur. Ona görə əraziyə sülhməramlıların yerləşdirilməsi məntiqli deyil. Bunun üçün BMT-nin müvafiq qərarı olmalıdır. Bu hərbi təlimlərlə İran və Ermənistanın bir-birinə xoşməramlı qonşu olduqlarını region və beynəlxalq ictimaiyyətə nümayiş etdirmək istəyir. İranın Yaxın Şərqdən sıxışdırıldığı bir vaxtda onun Ermənistana sülhməramlı yerləşdirmək ideyası aventüradır".
Həmayıl Şükürlü
16:48 10.04.2025
Oxunuş sayı: 11391
