Rusiya Ukraynadakı seçkilərə müşahidəçi göndərəcəkmi?
Rusiya Ukraynada keçiriləcək prezident və parlament seçkilərinə müşahidəçilər göndərməyəcək. Bu barədə Rusiya KİV-i diplomatik mənbələrə istinadla məlumat yayıb. Seçkilərdə Müstəqil Dövlətlər Birliyi (MDB), Çin, Hindistan, Avropa İttifaqı və ABŞ-dan müşahidəçilərin iştirakı nəzərdə tutulur.
Rusiya tərəfi NATO-ya üzv olan Avropa ölkələrinin, Kanada və Avstraliyanın Ukraynada sülhməramlı missiyalarda iştirakını qəti şəkildə rədd edir. ABŞ da bu yanaşmanı dəstəkləyir. Sülhməramlı missiyanın mandatının BMT tərəfindən verilməsi planlaşdırılır. Əvvəlcə BMT Təhlükəsizlik Şurasında müvafiq səsvermə keçiriləcək, ardınca isə sənəd BMT Baş Assambleyası tərəfindən ratifikasiya olunacaq.
Crossmedia.az xarici mənbələrə istinadən xəbər verir ki, hazırda missiyada iştirak edəcək ölkələrin siyahısı və onların Ukraynadakı dislokasiya bölgələri ilə bağlı müzakirələr davam edir.
Eyni zamanda, döyüş xəttindən hərbi qüvvələrin və texnikaların çıxarılması, bütün növ pilotsuz uçuş aparatları və raketlərlə zərbələrə moratorium qoyulması, Qara dənizdə gərginliyin azaldılması və taxıl dəhlizinin yenidən işə salınması istiqamətində danışıqlar aparılır.
Mənbələrin bildirdiyinə görə, gələn həftə Rusiya Xarici İşlər naziri Sergey Lavrov, ABŞ senatoru Marko Rubio, konqresmen Mayk Uoltz və Rusiya Prezidentinin köməkçisi Yuri Uşakov arasında ümumi gündəlik üzrə görüş keçiriləcək.
22:40 04.04.2025
Oxunuş sayı: 7895
