Aİ Azərbaycan qazına çıxışı genişləndirmək üçün infrastrukturun modernizasiyası üzərində işləyir
Avropa İttifaqı (Aİ) Azərbaycan qazına çıxışı genişləndirmək üçün infrastrukturun modernizasiyası istiqamətində fəal iş aparır və eyni zamanda metan emissiyalarını azaltmağa çalışır.
Crossmedia.az xəbər verir ki, bu barədə Aİ-nin enerji və mənzil siyasəti üzrə komissarı Dən Yorqensen Bakıda Cənub Qaz Dəhlizi və “yaşıl enerji” üzrə məsləhətçi şuraların nazirlər toplantısında çıxışı zamanı bildirib.
“Bütün maraqlı tərəflər yaxın illərdə Azərbaycan qazının regional bazarlara tədarük həcmini artırmağa çalışır. Azərbaycan ötən il COP29-da əldə etdiyi uğurlar sayəsində bu prosesə böyük töhfə verib. Biz bu impulsdan istifadə edərək enerji keçidini sürətləndirmək niyyətindəyik. Bu, 2030-cu ilə qədər bərpa olunan enerji istehsalının üçqat artırılması və enerji səmərəliliyinin ikiqat artırılması deməkdir. Bu məqsədə çatmaqda ‘Grids and Storage Pledge’ və ‘Global Methane Pledge’ təşəbbüsləri mühüm rol oynayır”, – deyə Yorqensen vurğulayıb.
O, Azərbaycanı metan emissiyalarının azaldılması sahəsində əldə etdiyi nəticələr münasibətilə təbrik edərək, ölkənin bu istiqamətdə regionda liderlik etdiyini qeyd edib.
“Biz Azərbaycanın sürətlə inkişaf edən bərpa olunan enerji sektoruna regional tərəfdaşlar, Avropa biznesi və investorlar tərəfindən böyük marağın olduğunu müşahidə edirik. Bu, regional inteqrasiyanı genişləndirmək, bazarları birləşdirmək və təmiz texnologiyalar sahəsində dəyər zəncirlərini formalaşdırmaq üçün yeni imkanlar yaradır”, – deyə Aİ rəsmisi əlavə edib.
Mədinə Cəlilova
22:06 04.04.2025
Oxunuş sayı: 10296
