Hakan Fidan: Ankara Suriyada İsraillə qarşıdurmaya girmək niyyətində deyil
Türkiyənin xarici işlər naziri Hakan Fidan Ankara administrasiyasının Suriyada İsraillə qarşıdurma istəmədiyini bəyan edib.
Crossmedia.az Türkiyə mətbuatına istinadən xəbər verir ki, onun sözlərinə görə, Suriyanın təhlükəsizliyi ilə bağlı qərarları ölkə sakinləri özləri verməlidir.
“Biz Suriyada İsraillə qarşıdurmanın olmasını istəmirik, çünki Suriya suriyalılarındır. Suriya nə Türkiyəyə, nə də İsrailə aid deyil. Biz suriyalıların adından danışa bilmərik. Onlar təhlükəsizlik məsələlərini özləri həll etməlidirlər. Əgər israillilər müəyyən razılaşmalar istəyirlərsə, bunun yolları var”, – deyə Fidan vurğulayıb.
Nazir həmçinin İsrailin Suriyadakı hərbi əməliyyatlarını tənqid edərək, bunun bölgədə sabitliyi pozduğunu bildirib:
“Təəssüf ki, İsrail yeni dövlətin İŞİD və digər terror hücumlarına qarşı istifadə edə biləcəyi bütün imkanları bir-bir məhv edir. Beləliklə, İsrailin Suriyada atdığı addımlar təkcə bu ölkənin təhlükəsizliyinə deyil, həm də regionun gələcək sabitliyinə ciddi təhdid yaradır. Bunun İsrailin regiondakı gələcəyi üçün müsbət nəticə verəcəyini düşünmürük”, – deyə o əlavə edib.
Bu açıqlamalar fonunda Türkiyənin Suriyadakı mövqeyinin aydın qalması və bölgədə mümkün eskalasiyanın qarşısının alınması diqqət mərkəzindədir.
Mədinə Cəlilova
21:30 04.04.2025
Oxunuş sayı: 731
