Azərbaycanın süni intellekt irəliləyişləri beynəlxalq konfransında təqdim edilib
Azərbaycanın süni intellekt sahəsindəki irəliləyişləri 24-26 mart tarixlərində Londonda keçirilən “Innovation 2025” beynəlxalq konfransında təqdim edilib.
Crossmedia.az bu barədə İqtisadiyyat Nazirliyinin Dördüncü Sənaye İnqilabının Təhlili və Koordinasiya Mərkəzinə (4SİM) istinadən xəbər verir.
4SİM-in icraçı direktoru Fariz Cəfərov "Süni intellekt məhsuldarlığın artırılmasına necə töhfə verə bilər?" adlı panel sessiyada spiker qismində çıxış edərək, ölkədə pilot olaraq müxtəlif qurumlar tərəfindən icra olunan süni intellekt həlləri və 4SİM-in bu istiqamətdə gördüyü işlər barədə məlumat verib.
Panelin digər spikerləri sırasında Kanadanın Əmək və Sosial İnkişaf Nazirliyinin Data üzrə baş direktoru İma Okonni, Böyük Britaniyanın Vorvik polis idarəsinin Data, texnologiya və strategiya üzrə direktoru Stefen Rassell, İsrail Milli Rəqəmsal Agentliyinin Data üzrə vitse-prezidenti Merav Peretz Belinsky və "Sullivan & Stanley"in Dəyişikliklər üzrə baş direktoru Adrian Stalham kimi tanınmış ekspertlər də yer alıb.
“İnnovasiya 2025” konfransı Böyük Britaniya Hökuməti, Böyük Britaniya Dövlət Xidməti və Nazirlər Kabinetinin dəstəyi və Qlobal Hökumət Forumu təşkilatçılığı ilə həyata keçirilir. Konfrans çərçivəsində dördüncü sənaye inqilabı texnologiyalarının dövlət xidmətlərində tətbiqi imkanları, vətəndaş cəmiyyətinin rəqəmsal bacarıqlarının artırılması, o cümlədən süni intellektin innovasiyanın və dövlət xidmətlərinin göstərilməsindəki təkanverici rolu kimi mövzulara həsr olunmuş panel müzakirələri, çıxışlar və B2B görüşlər baş tutub.
18:00 02.04.2025
Oxunuş sayı: 6914
