“Tramp Rusiya-Ukrayna müharibəsində vasitəçiliyi üzərinə götürə bilər”
Ukrayna Prezidenti Volodimir Zelenski Böyük Britaniyanın ITV News telekanalına verdiyi müsahibədə, 2025-ci ildə müharibənin başa çatmasının mümkün olduğunu, lakin bunun üçün müəyyən tədbirlərin görülməsinin vacibliyini bildirib. O, xüsusilə Rusiyaya qarşı sanksiyaların gücləndirilməsini və Ukraynaya real təhlükəsizlik zəmanətlərinin verilməsini tələb edib. Zelenski, ABŞ Prezidenti Donald Trampın da müharibənin 2025-ci ildə başa çatmasını istədiyini əlavə edib.
Məsələ ilə bağlı hərbi ekspert Azad İsasazə Crossmedia.az-a açıqlamasında bildirib ki, Ukrayna müharibəsinin aktiv fazası 2025-ci ildə sona çata bilər, lakin bu, münaqişənin tam həlli anlamına gəlmir.
“Hər şey mümkündür, amma gəlin, dediklərinə baxaq: müharibənin bitəcəyini deyənlər bizdən kənarda saxlanılır. Mən hesab edirəm ki, 2025-ci ildə bu müharibənin qaynar fazası bitəcək, amma sonra yenidən alovlana bilər. Əgər müqayisə etsək, 1994-cü ildə biz atəşkəs imzaladıq, lakin faktiki olaraq müharibə davam etdi və biz onu dayandıra bilmədik. I və II Qarabağ müharibələri bunun sübutudur. Lakin burada bir fərq var: o zaman iki dövlət arasında heç bir rəsmi sülh müqaviləsi bağlanmamışdı. Yalnız atəşkəs imzalanmışdı. Eyni şəkildə, Rusiya və Ukrayna arasında da oxşar bir atəşkəs bağlana bilər”. – deyə hərbi ekspert qeyd edib.
Onun sözlərinə görə, sülh danışıqları mümkündür, lakin tərəflər arasında ciddi fikir ayrılıqları mövcuddur.
“Danışıqlar ola bilər, amma tərəflər arasındakı şərtlər çox fərqlidir. İngilis vasitəçiliyinin burada həlledici rolu yoxdur. Hər iki tərəfin mövqeləri tamamilə ziddiyyət təşkil edir. Əgər atəşkəs bağlanarsa, çox güman ki, Rusiya və Ukrayna bu danışıqların əsas prinsiplərini müəyyənləşdirmək üçün vasitəçilərə ehtiyac duyacaqlar. Lakin bu, uğurlu olacaqmı? Qarabağ münaqişəsində də 30 il ərzində danışıq aparıldı, amma nəticə olmadı. İkinci və üçüncü müharibələrdən sonra belə sülh müqaviləsi bağlanmadı. Üstündən 4 il keçib, artıq 5-ci ilə daxil oluruq, lakin hələ də müharibənin tam həlli görünmür, çünki şərtlər dəyişib”. - hərbi ekspert vurğulayıb.
Hərbi ekspertin fikrincə, Rusiya-Ukrayna müharibəsində vasitəçilərin olması mümkündür və bu missiyanı ABŞ Prezidenti Donald Tramp öz üzərinə götürə bilər.
“Bu missiyanı Donald Tramp öz üzərinə götürərsə, onun rolu nə qədər əhəmiyyətli ola bilər. Trampdan əvvəl sülh danışıqları ilə bağlı ciddi addımlar atılmamışdı. Avropa, Afrika, Çin kimi güclər müxtəlif təşəbbüslərlə çıxış etsələr də, real nəticələr əldə olunmayıb. Amma indi hər şey dəyişə bilər. İlk addım atılsa, sülhə yaxınlaşmaq mümkündür”. – deyə Azad İsasazə qeyd edib.
Qeyd edək ki, Rusiya-Ukrayna müharibəsi 2022-ci il fevralın 24-də başlayıb və hələ də davam edir.
Maral Şahverdili
19:23 10.02.2025
Oxunuş sayı: 9567
