Dağılan evlər, birləşən ürəklər...- Əsrin fəlakətinin ikinci ili
Bu gün fevralın 6-dır. Yəni Türkiyədə baş verən və bütün dünyanı dərindən sarsıdan zəlzələdən 2 il keçir. Baş verən zəlzələnin miqyası, nəticələri tək Türkiyə üçün yox bütün dünya üçün ağır idi. Baş verən zəlzələdə:
Kahramanmaraşda dağıntılar altında qalan 4493-ü olmaqla ən azı 5323 nəfər həyatını itirib Yaralananların sayı 9243-ə çatdıb. Şəhərdə kütləvi dəfnlər baş verib, 5000-dən çox cəsəd basdırılıb.
Adana Şakirpaşa Hava Limanı uçuş-enmə zolağının zədələnməsi səbəbindən bağlandıb. Malatyada ən azı 300 bina dağılıb. Malatya Erhaç Hava Limanının tavanı, tarixi Yeni Camii məscidi qismən çöküb.
Ümumilikdə Türkiyənin 10 əyalətində azı 29,605 nəfər ölüb, 80,278 nəfər yaralanıb. Zəlzələdə ölənlərin sayı 48 448 nəfərə çatmışdı. Ən azı 13,5 milyon insan və 4 milyon bina zərər çəkib. Binalar dağılan zaman minlərlə insan dağıntılar altında qalıb. Türkiyənin 10 vilayətində 12141 bina dağıldı və yollarda geniş çatlara səbəb oldu. Bərpa işləri zamanı dağıntılar arasında hələ də bədən hissələri tapılırdı.
Ağır nəticələr verən bu zəlzələdən sonra Türkiyəyə dünyanın bütün ölkələri yardım təklif etdi. Hətta Türkiyəyə əks mövqedə dayanan Yunanıstan belə əlindən nə gəlirsə, edəcəyini bildirdi. Həqiqətən, bütün dünya təsirlənmişdi bu ağır müsibətdən. Azərbaycan isə soruşmaq üçün belə vaxt itirmədi və tez bir zamanda qardaş ölkənin imdadına çatdı. Zəlzələ öz torpaqlarımızda baş veribmiş, öz soydaşlarımıza zərər veribmiş kimi heç düşünmədən yardıma qaçdıq. Uşağımızla, böyüyümüzlə bütünlüklə Türkiyə ətrafında bir olduq. Elə, bəlkə də, öz soydaşlarımızdır deyə belaə ağır sarsıntı keçirdik.
Azərbaycan Prezident İlham Əliyev təbii fəlakətdən dərhal sonra türkiyəli həmkarı Rəcəb Tayyib Ərdoğana telefon zəngi edərək başsağlığı verib və yaralıların tez bir zamanda şəfa tapmasını diləyib. Fevral ayının 8-də isə Prezident İlham Əliyev Türkiyə səfirliyinə gedərək Azərbaycan xalqının baş verən hadisədən dərin təsirləndiyini bildirib.
İlham Əliyev başsağlığı verərkən artıq lazımi fərmanları imzalamış və Türkiyəyə ilkin yardım paketlərini göndərilmişdi.
Ölkəmizdən davamlı olaraq zəlzələ zonasına həkimlər, xilasedicilər, könüllülər göndərildi. Prezident İlham Əliyevin tapşırığına əsasən xilasedicilərdən ibarət ilk qrup elə həmin gün zəlzələ bölgəsinə yola düşdü. Eləcə də zərərçəkənlər üçün zəruri ləvazimatlar göndərildi. Türkiyədə çoxsaylı insan tələfatına səbəb olmuş zəlzələ qurbanlarına dəstək məqsədilə Azərbaycanın vitse-prezidenti, Heydər Əliyev Fondunun prezidenti Mehriban Əliyevanın göstərişinə əsasən, Heydər Əliyev Fondu tərəfindən qardaş ölkəyə humanitar yardım aparan xüsusi təyyarə fevralın 9-da Qaziantepə uçub. Faciədən zərər çəkmiş şəxslər üçün Heydər Əliyev Fondu 36 ton humanitar yardım göndərdi. Humanitar yardıma müxtəlif dərman preparatları, oksigen maskaları, filtrli sistemlər, sarğı materialları, onurğa taxtaları, ilkin yardım boyunluqları, xərək və s. tibbi ləvazimat və avadanlıqlar, isti geyimlər, çadırlar daxildir. Eləcə də, Heydər Əliyev Fondunun “Regional İnkişaf” İctimai Birliyi qardaş ölkəyə humanitar yardım kampaniyasına da start verdi. Azərbaycan qardaş Türkiyənin yanında olduğunu hər zaman olduğu kimi, zəlzələnin ilk saatlarından etibarən əməli fəaliyyəti ilə təsdiqləyib, öz dəstəyini, həmrəyliyini nümayiş etdirib. Bu acı faciənin fəsadlarının tezliklə aradan qaldırılmasını özünün şərəf işi, qardaşlıq borcu adlandırıb. Azərbaycan xilasediciləri dağıntılar altında fədakarcasına çalışırdı. Zatən ancaq Azərbaycan xilasediciləri qardaş ölkə üçün canını təhlükəyə ataraq xilasetmə əməliyyatlarında iştirak edə bilərdi və edirdi. Azərbaycandan davamlı olaraq həkimlər, xilasedicilər, könüllülər Türkiyəyə göndərilir, Türkiyədə baş vermiş dəhşətli zəlzələ nəticəsində zərərçəkənlərə yardım edilirdi. Azərbaycanda fəaliyyət göstərən QHT-lər “Qardaş köməyı” adlı platforma yaratdı və bu platforma vasitəsilə kömək etmək istəyən şəxslər qardaş ölkədə zəlzələdən əziyyət çəkən vətəndaşlara müxtəlif ləvazimatlar göndmək imkanı qazandı.
Prezident İlham Əliyevin göstərişinə əsasən Türkiyəyə ezam olunmuş Azərbaycan Ordusunun hərbi tibb personalı fevralın 8-dən etibarən Kahramanmaraşda fəaliyyətə başladı. Ümumi cərrah, travmatoloq, LOR cərrah, oftalmoloq, neyrocərrah, revmatoloq, anestezioloq, plastik-rekonstruktiv cərrah, feldşer, əməliyyat tibb bacıları və anestezistlər olmaqla, ümumilikdə 20 nəfərlik hərbi tibb personalı baş vermiş zəlzələdə xəsarət alan insanlara tibbi yardımın göstərilməsi məqsədilə hadisənin ilk saatlarından etibarən qardaş ölkəyə ezam olunub. Azərbaycanın bir çox bölgəsi Türkiyədə baş vermiş güclü zəlzələdən zərərçəkənlərə yardım aksiyasına fəal qoşuldu. Qeyri-sabit, qarlı-yağışlı hava şəraitinə baxmayaraq, ölkənin müxtəlif şəhər və rayonlarında yaşayan sakinlər səhər saatlarından etibarən axın-axın təşkil olunan yardım toplama məntəqələrinə gəlir, gətirdikləri əşyaları aidiyyəti üzrə məsul şəxslərə, könüllülərə təhvil verirdilər. Həmçinin Prezident İlham Əliyevin tapşırığına əsasən Türkiyədə olan Fövqəladə Hallar Nazirliyinin çevik xilasetmə qüvvələri qardaş ölkədə baş vermiş güclü zəlzələnin fəsadlarının aradan qaldırılması və axtarış-xilasetmə əməliyyatlarını fasiləsiz davam etdirirdi. Zəlzələ hamımızı kədərləndirsə də, bir həqiqəti növbəti dəfə ortaya qoydu ki, Türkiyə-Azərbaycan münasibətləri bütün sınaqlar və bütün dövrlər üçün dünyaya örnək olacaq səviyyədədir. Biz qardaş xalq olaraq bu çətin günlərdə hər zaman qardaşlıq borcumuzu yerinə yetirib Türkiyənin yanında olduq və hər zaman da olacağıq.
Ayhan Ağarzayev
13:18 06.02.2025
Oxunuş sayı: 4443
