Almaniyanın müxalifət lideri sərt miqrasiya planı ilə tənqid olunur
Almaniyanın müxalifət lideri, Xristian Demokratik İttifaqının (CDU) sədri Fridrix Mers kansler seçildiyi təqdirdə sərt sərhəd nəzarəti tətbiq edəcəyini vəd etdiyi üçün tənqid olunub. O, bu addımını sığınacaq müraciəti rədd edilən bir şəxsin törətdiyi iddia edilən ölümcül bıçaq hücumunu əsas gətirərək miqrasiya sistemində islahatların vacibliyi ilə izah edib.
Crossmedia.az xarici KİV-ə istinadən xəbər verir ki, Mers digər məsələlərlə yanaşı, etibarlı sənədləri olmayan şəxslər üçün "faktiki giriş qadağası" və Almaniyanın bütün sərhədlərində daimi nəzarət tətbiq edilməsini nəzərdə tutan beş maddəlik miqrasiya planını təqdim edib. Mers bu planı Bavariyanın Aşaffenburq şəhərində iki nəfərin, o cümlədən, 2 yaşlı bir uşağın öldüyü və daha üç nəfərin yaralandığı hücumdan bir gün sonra açıqlayıb.
Hadisədən dərhal sonra saxlanılan şübhəli, psixi problemləri və zorakılıq tarixçəsi olan 28 yaşlı bir əfqan olub. O, bir ay əvvəl Almaniyanı könüllü tərk edəcəyini bildirib.
Məlumata görə, bir sıra siyasətçilər Mersin planını hüquqi baxımdan mübahisəli və həyata keçirilməsi çətin hesab edərək tənqid ediblər. Onlar bu planın Cenevrə Konvensiyası və Aİ-nin sərbəst hərəkət prinsipi kimi miqrasiya və sığınacaq qanunları ilə uyğun gəlmədiyini bildiriblər.
Qeyd edək ki, Bundestaqda Yaşıllar partiyasının sədr müavini Konstantin fon Nots bu tədbirlərin nə konstitusiyaya, nə də Avropa hüququna uyğun olduğunu bildirib.
Fatimə Məmmədova
10:20 25.01.2025
Oxunuş sayı: 1518
