COP29
"Qlobal istiləşməni 1,5°C səviyyəsində saxlamaq həyati əhəmiyyət daşıyır" - AÇIQLAMA
Azərbaycanın ev sahibliyi etdiyi COP29 tədbiri qlobal iqlim dəyişiklikləri ilə mübarizədə ölkəmizin lider mövqeyini bir daha nümayiş etdirdi. Bu nüfuzlu konfrans, beynəlxalq iqlim siyasətində mühüm dönüş nöqtəsi olaraq yadda qaldı. COP29-un ən diqqətçəkən nəticələrindən biri qlobal iqlim maliyyələşməsinin vacibliyinin vurğulanması oldu. Xüsusilə, “Bakı Maliyyə Məqsədi” təşəbbüsü çərçivəsində qəbul edilən qərarlar iqlim dəyişikliyi ilə mübarizədə effektiv mexanizmlərin tətbiqinə zəmin yaratdı. Bu təşəbbüs, həmçinin İslam İnkişaf Bankı Qrupunun maliyyə imkanlarını genişləndirmək məqsədini dəstəkləyərək, iqtisadiyyatı zəif olan ölkələr üçün əlavə maliyyə dəstəyi təmin etməyi hədəfləyir.
Mövzu ilə bağlı Crossmedia.az-a açıqlama verən “Yaşıl Dünya” Ekoloji Maarifləndirmə İctimai Birliyinin sədri Elman Cəfərli bildirib ki, COP29-un Azərbaycanda keçirilməsi həm məzmun, həm də nəticələr baxımından yüksək səviyyədə təşkil olunmuş bir tədbir idi.
“Konfransın sonunda iqlim maliyyələşməsi ilə ciddi qərarlar qəbul olundu. Öncədən və müzakirələrin gedişində gərgin ziddiyyətlər, fikir ayrılıqları, bir-birini təkzib edən planlar təklif olunsa da, ölkəmizdə böyük bir razılaşma əldə edildi. Bu razılaşmaları həm də yaşıl gələcəyə hesablanmış bir addım kimi xarakterizə etmək olar”- deyə o deyib.
Ekspert, qeyd edib ki, COP29 çərçivəsində əldə olunan ən mühüm razılaşmalardan biri, inkişaf etməkdə olan ölkələr üçün 2035-ci ilə qədər hər il 1,3 trilyon dollar iqlim maliyyəsi ayırmağı nəzərdə tutan “Bakı Maliyyə Məqsədi” ilə bağlıdır. Ekoloqun sözlərinə görə, “Bakı Maliyyə Məqsədi həm də Paris Sazişinin 10 illər ərzində razılaşdırılmayan 6-cı maddəsinin işlək vəziyyətə gətirilməsini təmin etdi. Bu, atmosferə buraxılan çirkli qazların həcminin azaldılması ilə bağlı dəqiq öhdəliklərin müəyyən olunmasına gətirib çıxardı”.
E.Cəfərlinin fikrincə, bu qərarlar qlobal istiləşməni 1,5°C səviyyəsində saxlamaq üçün həyati əhəmiyyət daşıyır. COP29 iqlim diplomatiyasında dönüş nöqtəsi kimi qiymətləndirilməlidir. Bakı Maliyyə Məqsədi, xüsusilə inkişaf etməkdə olan ölkələr üçün maliyyə dəstəyinin artırılmasını təmin edəcək.
Eyni zamanda, iqtisadi tərəfi nəzərə alaraq, Natiq Cəfərovla da bu məsələyə dair müzakirələr apardıq.
Açıqlaması zamanı iqtisadçı qeyd edib ki, ABŞ-ın iqlim təşəbbüsləri ilə bağlı mövqeyi qlobal səviyyədə təsirli bir faktor olaraq qalır.
O bildirib ki, “ABŞ Tramp administrasiyası ilə iqlim sazişindən çıxmaq istəyir. Əgər ABŞ bu təşəbbüslərdən geri çəkilsə, iqlim maliyyələşməsi ilə bağlı proseslərdə böyük çətinliklər yarana bilər”.
Natiq Cəfərlinin fikrincə, Azərbaycanın COP29 çərçivəsində həyata keçirdiyi tədbirlər, xüsusilə “Bakı Maliyyə Məqsədi” təşəbbüsü, çox mühüm bir addımdır. “Bu mexanizmlər Azərbaycanın beynəlxalq səviyyədə iqlim dəyişikliyi ilə mübarizədə nümunəvi bir mövqe sərgilədiyini göstərir. Bununla belə, gələcək mərhələlərdə dünya ölkələrinin mövqeyi həlledici olacaq”, - deyə iqtisadçı qeyd edib.
Gültac Mehdizadə
20:10 20.01.2025
Oxunuş sayı: 12625
