ADPU-nun Quba filialında 20 Yanvar şəhidləri anılıb
Milli birlik və vətənpərvərliyin simvoluna çevrilmiş 20 Yanvar faciəsi xalqımızın öz azadlığı uğrunda apardığı mübarizənin şərəfli tarixidir. Azərbaycan xalqı onun qanlı yaddaşında silinməz iz qoyan 20 Yanvar faciəsini hər il yad edir, öz qəhrəman övladlarının əziz xatirəsini dərin ehtiramla anır və bu faciəni heç vaxt unutmayacaq.
Bu barədə Azərbaycan Dövlət Pedaqoji Universitetinin (ADPU) Quba filialında 20 Yanvar – Ümumxalq Hüzn Günü ilə əlaqədar təşkil olunan “20 Yanvar - tarixi yaddaşımız” mövzusunda anım tədbirində bildirilib.
Mərasimdə şəhid ailələrinin nümayəndələri, ADPU-nun Quba filialının professor-müəllim və tələbə heyəti iştirak edib.
Heydər Əliyev Lektoriyasında təşkil olunan tədbirdə Dövlət himni səsləndirilib, ümummilli lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Anım mərasiminin əvvəlində 1990-cı ildə Azərbaycan xalqına qarşı törədilən hərbi cinayətə etiraz etmək üçün qanlı hadisədən dərhal sonra Azərbaycan Respublikasının Moskvadakı Daimi nümayəndəliyinə gələrək bu insanlıq faciəsini törədənləri kəskin ittiham edən Ulu Öndər Heydər Əliyevin mətbuat konfransındakı çıxışından bir parça nümayiş olunub.
Filialın direktoru, fizika elmləri doktoru, dosent Yusif Alıyev xalqımızın apardığı milli-azadlıq mübarizəsinin ayrı-ayrı istiqamətlərinə toxunaraq Ulu Öndər Heydər Əliyevin hakimiyyəti dövründə qazanılan milli-ideoloji nailiyyətləri ümumxalq sərvəti kimi dəyərləndirib. Keçmiş SSRİ-nin süqutu illərində təcavüzkar Ermənistanın Azərbaycana qarşı qaldırdığı əsassız ərazi iddiaları ilə başlanan proseslərdə Azərbaycan xalqının göstərdiyi müqavimətdə Ümummilli Lider Heydər Əliyevin formalaşdırdığı ideoloji xəttin tarixi rol oynadığını diqqətə çatdıran direktor deyib ki, 20 Yanvar hadisələri Azərbaycan üçün ümumxalq faciəsi olmaqla bərabər, həm də dövlətçilik yolunda milli-azadlıq salnaməsinin başlanğıc nöqtəsi olduğu üçün tarixi yaddaşımızı özündə əks etdirir. Dünya şöhrətli siyasi xadim Azərbaycanın daimi nümayəndəliyinə gələrək bu faciəni törədənləri ifşa etdi, onları insanlıq cinayəti törətməkdə suçlayaraq qanlı hadisənin ört-basdır edilməsinə imkan vermədi. Xalqımızın haqq səsi bütün dünyaya yayıldı. Sonrakı dövrdə məhz Ulu Öndərin təşəbbüsü və birbaşa iştirakı ilə Azərbaycan parlamenti 20 Yanvar faciəsinə hüquqi-siyasi qiymət verərək təqsirkarların adlarını açıqladı. Müzəffər Ali Baş Komandan İlham Əliyevin rəhbərliyi ilə qəhrəman Azərbaycan Ordusunun 44 günlük vətən müharibəsində qazandığı rəşadətli Zəfər və 2023-cü ilin sentyabrında keçirilmiş lokal xarakterli antiterror əməliyyatları nəticəsində Azərbaycanın ərazi bütövlüyü və suverenliyinin bərpa olunması xalqımızın milli-azadlıq və dövlətçilik arzularının gerçəkləşməsidir.
Tədbirdə Heydər Əliyev Lektoriyasının müdiri Nəhayət Şirinova, şəhid ataları Ayaz Fətəliyev, Muxtar Murtuzov çıxış edərək 20 Yanvar faciəsində baş verənləri Azərbaycan xalqının milli cəsarəti, qəhrəmanlığı, xalqımızın bütövlüyünün, birliyinin, həmrəyliyinin, torpağa və Vətənə bağlılığımızın bariz nümunəsi olduğunu ifadə ediblər.
Anım tədbirinin bədii hissəsində Azərbaycan Dövlət Pedaqoji Universitetinin Quba filialının tələbələri Şəhanə Hüseynova və Aysun Əliyeva 20 Yanvar faciəsinə, şəhidlərimizin qəhrəmanlığına həsr olunan şeirlər oxuyublar.
Pedaqoji Universitetin Quba filialının dəhlizində 20 Yanvar – Ümumxalq Hüzn Gününə aid acılar, faciənin siyasi səbəb, məqsəd və nəticələrini özündə əks etdirən nadir əsərlərdən ibarət kitab sərgisi qurulub. (Azərtac)
20:20 18.01.2025
Oxunuş sayı: 17013
