Pakistan səfiri ADU-nun qonağı oldu
Pakistan İslam Respublikasının ölkəmizdə yeni təyin olunmuş fövqəladə və səlahiyyətli səfiri Qasım Mohiuddin Azərbaycan Dillər Universitetinin (ADU) qonağı olub. Azərbaycan Dillər Universitetinin rektoru, akademik Kamal Abdulla səfiri və qonaqları salamlayıb, onları universitetdə görməkdən məmnun olduğunu bildirib.
Görüşdə ADU-da həyata keçirilən müxtəlif layihələr, müəllim-tələbə mübadiləsi proqramları haqqında məlumat verilib. Azərbaycan və Pakistan arasında olan dostluq və tərəfdaşlıq münasibətlərinin bütün sahələrdə olduğu kimi, elm, mədəniyyət və təhsil sahəsində də yüksələn xətlə inkişaf etdiyi vurğulanıb. ADU-da fəaliyyət göstərən beynəlxalq dil və mədəniyyət mərkəzləri haqqında qonaqlara məlumat verən rektor Pakistan Mədəniyyət Mərkəzinin qazandığı uğurlardan danışıb.
ADU-da keçirilən “Səfir saatı” layihəsinin tarixindən və tələbələr üçün əhəmiyyətindən danışan rektor Pakistan İslam Respublikasının səfiri Qasim Mohiuddini “Səfir saatı” layihəsində iştirak etməyə dəvət edib.
Səmimi qarşılanmaya və xoş sözlərə görə minnətdarlığını bildirən səfir iki ölkə arasında qarşılıqlı əməkdaşlığın, strateji tərəfdaşlığın yüksələn xətt üzrə inkişaf etdiyini vurğulayıb. Qeyd olunub ki, elmi əməkdaşlıq çərçivəsində hər iki ölkənin dil və mədəniyyət mərkəzlərinin fəaliyyət göstərməsi tərəfdaşlığın və dostluğun göstəricidir.
Görüş gələcək elmi, mədəni əməkdaşlığın qurulması və inkişaf etdirilməsi ətrafında aparılan müzakirələrlə davam edib. ADU-nun kollektivi adından səfirə xatirə hədiyyəsi təqdim olunub.
Daha sonra Pakistan İslam Respublikasının ölkəmizdəki fövqəladə və səlahiyyətli səfiri Qasim Mohiuddin ADU-da fəaliyyət göstərən Pakistan Mədəniyyət Mərkəzinin fəaliyyəti ilə tanış olub, pakistanşünaslıq ixtisası üzrə təhsil alan tələbələrlə görüşüb.
23:39 17.01.2025
Oxunuş sayı: 23109
