Xarici xəbərlər
Modi: Hindistanın bütün bölgələri maoçu silahlılardan azad edilib
Hindistanın Baş naziri Narendra Modi ölkənin bütün bölgələrinin maoçu silahlılardan təmizləndiyini bəyan edib.
Crossmedia.az xəbər verir ki, "TASS" bu barədə məlumat yayıb.
Modi bu açıqlamanı Çhattisqarh ştatının Bastar dairəsində, Mərkəzi Ehtiyat Polis Qüvvələrinin düşərgəsində təhlükəsizlik qüvvələrinin əməkdaşları ilə birlikdə Divali bayramını qeyd edərkən səsləndirib.
Baş nazir bildirib ki, 2026-cı il Divali bayramı ölkə üçün xüsusi əhəmiyyət daşıyır. Onun sözlərinə görə, bu, Hindistanın uzun illər davam edən nakasalizm və maoçu terrorla mübarizədə qalib gəldiyi ilk Divali bayramıdır.
Modi qeyd edib ki, maoçu terrora və nakasalizmə qarşı mübarizə asan olmayıb. O bildirib ki, silahlı qruplaşmalar insanların səsvermə hüququnu əlindən alıb və il ərzində 2 minə qədər hücum həyata keçirib.
Baş nazir 2010-cu ildə Dantevada yaxınlığında maoçularla toqquşma zamanı Mərkəzi Ehtiyat Polis Qüvvələrinin 76 əməkdaşının həlak olduğunu, həmin il bölgədə baş verən digər hadisə nəticəsində isə 44 mülki şəxsin öldüyünü xatırladıb.
Qeyd edək ki, Hindistanda maoçular və ya nakasalitlər adlandırılan sol radikal qruplar 1960-cı illərdən fəaliyyət göstərir. Onlar maoizm və marksizm-leninizmin öz versiyalarını təbliğ edir, yoxsul kəndliləri “kapitalist zülmündən” azad etmək uğrunda mübarizə apardıqlarını bildirirlər. Hindistan hökuməti maoçuları ölkənin əsas daxili təhlükəsizlik təhdidlərindən biri hesab edir.
Divali hinduizmin ən mühüm bayramlarından biridir və bəzən Hindistanın Yeni ili adlandırılır. Bayram günlərində evlərdə və küçələrdə lampalar yandırılır, şəhərlərdə atəşfəşanlıq təşkil olunur.
13:25 08.11.2026
Oxunuş sayı: 43
