Sosium

2025-ci il dövlət büdcəsi sosial rifah və iqtisadi inkişafı hədəfləyir

Azərbaycan Respublikasının 2025-ci il dövlət büdcəsi ölkənin sosial-iqtisadi inkişaf hədəflərinə uyğun olaraq təsdiqlənib. Büdcə layihəsi iqtisadi dayanıqlığın möhkəmləndirilməsi, vətəndaşların rifah səviyyəsinin yüksəldilməsi və prioritet sahələrin inkişafının dəstəklənməsi məqsədini daşıyır. Strateji hədəflərə əsaslanan bu büdcə, maliyyə intizamının təmin edilməsi və səmərəli xərcləmə prinsiplərini ön plana çəkir. Bu qərar ölkənin uzunmüddətli davamlı inkişafına və iqtisadi sabitliyinə xidmət edən mühüm bir addım kimi də qiymətləndirilir.

Mövzu ilə bağlı iqtisadçı ekspert Eyyub Kərimli Crossmedia.az-a verdiyi açıqlaması zamanı bildirib ki, 2025-ci il üçün Azərbaycan Respublikasının dövlət büdcəsi təxminən 41,4 milyard manat həcmində nəzərdə tutulub. Onun sözlərinə görə, bu vəsaitin əsas istiqamətləri arasında sosial xərclər, müdafiə, təhsil, səhiyyə, işğaldan azad edilmiş ərazilərin bərpası və iqtisadi inkişaf tədbirləri xüsusi yer tutur:

“Sosial yönümlü xərclər ümumi büdcənin 41%-ni təşkil edəcək ki, bu da dövlətin sosial siyasətə önəm verdiyini göstərir. Əməkhaqqı ödənişlərinə isə büdcənin 23,5%-i ayrılacaq. Təhsil sahəsinə xərclər 11,9%-lə təxminən 4,5 milyard manat, səhiyyə üçün isə büdcənin 4,8%-i ayrılıb. Bundan əlavə, sosial müdafiə və sosial təminat üçün 11,5%-lik büdcə nəzərdə tutulub”.

E.Kərimli həmçinin işğaldan azad edilmiş ərazilərə xüsusi diqqət ayrıldığını da vurğulayıb:

“Bu ərazilərin bərpası üçün dövlət büdcəsinin 19,7%-i ayrılacaq. Bu da təxminən 4 milyard manat təşkil edir. Dövlət büdcəsi hesabına ayrılan bu vəsait həmin ərazilərdə infrastrukturun bərpası, iqtisadi fəaliyyətin stimullaşdırılması və dayanıqlı həyat şəraitinin yaradılması üçün də istifadə olunacaq”.

İqtisadçı ekspert, eyni zamanda müdafiə xərclərinin də prioritet sahələrdən biri olduğunu qeyd edib. Onun fikrincə, büdcənin 19%-i, yəni təxminən 8 milyard manat, ölkənin müdafiə potensialının gücləndirilməsinə yönəldiləcək:

“İqtisadi inkişaf və bərpa tədbirləri üçün ümumi büdcənin 20,2%-i ayrılması planlaşdırılıb. Bu vəsait əsasən işğaldan azad edilmiş ərazilərin iqtisadi dirçəlişi, yeni infrastruktur layihələrinin icrası, güzəştli kreditlərin təqdim edilməsi və iqtisadi aktivliyin artırılması məqsədilə istifadə olunacaq”.

“Azərbaycan hökuməti bu büdcə ilə ölkədə sosial rifahı gücləndirmək, müdafiə qabiliyyətini artırmaq və dayanıqlı iqtisadi inkişafı təmin etmək niyyətindədir. Dövlətin bu istiqamətdə atdığı addımlar ölkənin gələcək inkişaf perspektivlərini daha da möhkəmləndirəcək”, -deyə E.Kərimli bildirib.

Aytac Bəhruzqızı