Bəqai: İsraildə seçkilərin nəticəsi Tehran üçün heç nəyi dəyişməyəcək
İran Xarici İşlər Nazirliyi İsraildə keçiriləcək seçkilərin nəticəsinin Tehranın mövqeyinə təsir etməyəcəyini bəyan edib.
Crossmedia.az xəbər verir ki, İran Xarici İşlər Nazirliyinin sözçüsü İsmayıl Bəqai bu barədə açıqlama verib.
Bəqai bildirib ki, İsraildə keçiriləcək seçkilərdən sonra ölkəyə kimin rəhbərlik etməsi Tehran üçün əhəmiyyət daşımır.
Onun sözlərinə görə, İsrail siyasətçiləri “kimin daha çox cinayət törədəcəyi uğrunda bir-biri ilə yarışırlar”.
İran XİN rəsmisi ölkəsinin nüvə proqramı ilə bağlı ittihamlara da münasibət bildirib.
O qeyd edib ki, İran heç vaxt nüvə silahına malik olmayıb və belə silah yaratmağa çalışmayıb.
Bəqai ABŞ-nin Tehranı nüvə bombası hazırlamaqda ittiham etdiyini, lakin Vaşinqtonun 2015-ci ildə imzalanmış nüvə sazişindən çıxdığını və sonradan İrana qarşı genişmiqyaslı sanksiyalar tətbiq etdiyini xatırladıb.
İran XİN sözçüsünün iddiasına görə, ABŞ İranın nüvə silahı əldə etmək niyyəti ilə bağlı ittihamlardan hərbi əməliyyatlara əsas kimi istifadə edib.
O bildirib ki, Vaşinqton İranın nüvə proqramını məhv etdiyini açıqlamasından səkkiz ay sonra da həmin ittihamları təkrarlamağa davam edib.
Bəqai Avropa ölkələrinin Tehrana danışıqlarla bağlı təkliflər göndərdiyinə dair məlumatları da şərh edib.
Onun sözlərinə görə, İran danışıqların vacibliyini vurğulayan ümumi bəyanatdan başqa, Avropa dövlətlərindən hər hansı konkret təşəbbüs almayıb.
14:30 26.10.2026
Oxunuş sayı: 52
