Ermənistan Qərbə meyl edir, lakin Rusiyadan uzaqlaşmaq gücündə deyil
Ermənistanın Kollektiv Təhlükəsizlik Müqaviləsi Təşkilatı (KTMT) və Avrasiya İqtisadi İttifaqından çıxmamasının bir sıra obyektiv və subyektiv səbəbləri var. Anti-Rusiya əhval-ruhiyyəsinin artmasına baxmayaraq, ölkə hələ də bu qurumlarda qalır. Bunun əsas səbəblərindən biri Ermənistanın təhlükəsizlik və iqtisadi maraqlarını təmin etməkdə çətinlik çəkməsidir.
Mövzu ilə bağlı Crossmedia.az-a danışan politoloq Hüseyn İbrahimov bildirib ki, Ermənistanın bu təşkilatlardan çıxmaması həm siyasi, həm iqtisadi, həm də geosiyasi amillərlə bağlıdır. Onun sözlərinə görə, “Ermənistan KTMT-nin üzvü kimi formal olaraq zəifləsə də, ölkə ərazisində Rusiyaya məxsus hərbi qüvvələr hələ də mövcuddur. Eyni zamanda, Ermənistanda strateji əhəmiyyətli yerlərin bir çoxu hələ də Rusiyanın təsir dairəsindən çıxmayıb”.
Politoloq əlavə edib ki, “Rusiyanın Ermənistanda əvvəlki rəhbər vəzifələrdə olmuş şəxslərlə yaxın əlaqələri var. Bu əlaqələrə baxmayaraq, geniş ictimaiyyət səviyyəsində anti-Rusiya əhval-ruhiyyəsi tam yayılmayıb. Bu səbəbdən də Ermənistanın yaxın gələcəkdə KTMT-dən çıxması ehtimalı azdır”.
Avrasiya İqtisadi İttifaqına gəldikdə isə, Hüseyn İbrahimov vurğulayıb ki, “Ermənistanın ticarət dövriyyəsində Rusiyanın əsas yer tutduğunu nəzərə alsaq, bu qurumdan çıxmaq iqtisadi böhrana səbəb ola bilər. İqtisadiyyatın zəiflədiyi bir dövrdə Rusiya ilə ticarət əlaqələri Ermənistan üçün həyati əhəmiyyət daşıyır. Buna görə də, Ermənistanın Avrasiya İqtisadi İttifaqından çıxması real deyil”.
Politoloq, həmçinin qeyd edib ki, “Ermənistanın son vaxtlar Rusiyadakı görüşlərdə iştirak etməməsi və sərt çıxışlar etməsi popülist addımlardır. Lakin real vəziyyətdə Ermənistan Rusiyadan uzaqlaşmaq gücündə deyil”.
İbrahimovun fikrincə, “KTMT-dən çıxmaq təhlükəsizlik baxımından Ermənistan üçün problem yarada bilər. Qərb monitorinq qurumlarının fəaliyyəti yetərli deyil və Ermənistanın təhlükəsizliyini tam təmin etmir. Buna görə də, Ermənistanın KTMT-dən çıxması mümkündür, lakin Avrasiya İqtisadi İttifaqından çıxması ciddi iqtisadi problemlərə səbəb ola bilər”.
Maral Şahverdili
13:13 06.01.2025
Oxunuş sayı: 5558
