İran Almaniya səfirini Xarici İşlər Nazirliyinə çağırıb
İran Almaniya rəsmilərinin Tehranla bağlı “əsassız ittihamları təkrarlamasına” etiraz olaraq Almaniyanın bu ölkədəki səfiri Aksel Dittmanı Xarici İşlər Nazirliyinə çağırıb.
Crossmedia.az xəbər verir ki, bu barədə İranın “Tasnim” xəbər agentliyi məlumat yayıb.
Məlumata görə, Almaniya səfirini İran Xarici İşlər nazirinin müavini, Qərbi Avropa üzrə baş direktor Əlirza Yusifi qəbul edib və ona Tehranın etirazını çatdırıb.
Yusifi bildirib ki, İranı təhlükəsizlik məsələlərində ittiham etmək “sionist rejimin və bəzi Qərb ölkələrinin İrana qarşı uzun müddətdir tətbiq etdiyi siyasətdir”.
Bu addım Almaniyanın da bazar ertəsi İran səfirini Xarici İşlər Nazirliyinə çağırmasından sonra atılıb. Berlin Tehranı İsraili dəstəkləyən şəxslərə qarşı sui-qəsd cəhdləri planlaşdırmaqda ittiham edib və iddia edilən planları kəskin şəkildə pisləyib.
Almaniya Xarici İşlər Nazirliyi sosial şəbəkədə yaydığı bəyanatda bildirib: “Biz yəhudilərin həyatına və onları müdafiə edən şəxslərə qarşı hücumlara heç yerdə, xüsusilə də Almaniyada dözməyəcəyik”.
08:50 20.10.2026
Oxunuş sayı: 47
