Qazi atanın şəhid oğlu “Murov Aslanı” - Şəhid Mayor İlkin Rzayev
Mayor Rzayev İlkin Cəfər oğlu, 28 iyul 1984-cü ildə Naxçıvanın Şərur rayonunun Ələkli kəndində doğulub. İlk təhsil illərini Bakının Suraxanı rayonundakı 270 nömrəli məktəbdə başladı, sonra isə Nizami rayonundakı 250 nömrəli məktəbdə davam etdirib, 2001-ci ildə əla qiymətlərlə məzun oldu.
Ata və əmisi Birinci Qarabağ müharibəsinin qazisi idilər. Onların qəhrəmanlıq hekayələri İlkinin qəlbində dərin əbədi iz qoymuşdu. O, erməni vəhşiliklərinə qarşı dərin bir nifrət və qisas hissi bəsləyirdi. Atası Füzuli döyüşlərinə könüllü olaraq qoşulmuş və İlkinə "Mən döyüşə getdim ki, sizin kimi balalara bu döyüş qalmasın" demişdi. Bu sözlər İlkinin həyat yolunu müəyyən etdi.
İlkin 2002-ci ildə Heydər Əliyev adına Azərbaycan Ali Hərbi Məktəbinə qəbul oldu və 2006-cı ildə Quru Qoşunları fakültəsini bitirdi. Müdafiə Nazirliyinin əmri ilə "leytenant" rütbəsi aldı. Xidməti dövründə Tovuz, Murovdağ, Beyləqan və Fizuli kimi bölgələrdə qəhrəmanlıqla xidmət etdi. Xüsusilə aprel və iyul döyüşlərində böyük şücaət göstərdi və onlarla fəxri fərmana layiq görüldü.
27 sentyabr 2020-ci ildə başlayan Vətən müharibəsində Mayor İlkin Rzayev, 2 oktyabrda mühasirəyə düşmüş döyüş yoldaşlarını xilas etdi. Onun "Mən bu postda şəhid olaram, amma birinizi də düşmən gülləsinə qurban vermərəm" sözləri əsgərlərinin yaddaşından silinməz. İlkin o gün şəhidlik zirvəsinə ucaldı və 76 gün sonra nəşi ailəsinə təhvil verildi. O, 2-ci Fəxri Xiyabanda dəfn olundu və arxasında iki körpə - qızı Nur və oğlu Əlini qoydu.
Sağlığında:
1)Azərbaycan Respublikası - 90 illiyi yubiley medalı
2)Azərbaycan Respublikası - 95 illiyi yubiley medalı
3)Azərbaycan Respublikası - 100 illiyi yubiley medalı
4)Hərbi xidmətdə Fərqlənməyə görə 3-cü dərəcəli medal
5)Qüsursuz xidmətə görə 3-cü dərəcəli medal
6)Qüsursuz xidmətə görə 2-ci dərəcəli medal
ŞƏHİDLİKDƏN sonra:
1)Azərbaycan Bayrağı ordeni.
2)Vətən uğrunda medalı.
3)Kəlbəcərin işğaldan azad olunmasına görə medalları ilə təltif olunub.
İlkin Rzayevin həyatı və xidməti bizə böyük bir dərs verdi: Vətən sevgisi ilə dolu bir ömür, qəhrəmanlıqla bəzənir və şəhidlik zirvəsi ilə tamamlanır.
Samirə Şərif
12:13 03.01.2025
Oxunuş sayı: 11026
