Xarici xəbərlər
Böyük Britaniyada parçalanma təhlükəsi ilə üz-üzə - 3 ölkənin lideri bir araya gəlir
Böyük Britaniyanı təşkil edən dörd ölkədən üçündə hakimiyyətdə olan müstəqillik tərəfdarı partiyaların liderləri bir araya gələrək müstəqillik və öz müqəddəratını təyinetmə hüququnu müzakirə edəcəklər.
Crossmedia.az xarici KİV-ə istinadən xəbər verir.
Şotlandiya, Şimali İrlandiya və Uelsdə hakimiyyətdə olan müstəqillik tərəfdarı partiyaların açıqlamasına görə, Şotlandiyanın birinci naziri Con Svinni, Şimali İrlandiyanın birinci naziri Mişel O'Nil və Uelsin Plaid Cymru partiyasının lideri Rhun ap Iorverth sabah Uelsin paytaxtı Kardiffdə görüşəcəklər.
Görüşdə üç ölkəni maraqlandıran ortaq məsələlər, eləcə də öz müqəddəratını təyinetmə hüququ müzakirə olunacaq.
SNP, Sinn Féin və Plaid Cymru liderlərinin görüşünə İrlandiya Respublikasının millətçi Sinn Féin partiyasının lideri Meri Lu MakDonald da qatılacaq.
Görüşə Plaid Cymru lideri Rhun ap Iorverth ev sahibliyi edəcək. Tərəflərin Şotlandiya, Uels və Şimali İrlandiyanın ortaq maraqları ilə yanaşı, müstəqillik məsələsini də müzakirə edəcəyi bildirilir.
Britaniyanın “The Telegraph” qəzeti isə görüş zamanı üç liderin müstəqillik referendumunun keçirilməsi ilə bağlı anlaşma memorandumu imzalayacağını yazıb.
Sənədin əsas məqsədinin müstəqillik tələbini yenidən gündəmə gətirmək və Böyük Britaniya hökumətinə bu istiqamətdə daha çox təzyiq göstərmək olduğu qeyd edilir.
Uels və Şotlandiyada müstəqillik tərəfdarları hakimiyyətdədir
Uels və Şotlandiyada müstəqillik tərəfdarı partiyalar parlamentlərdə mütləq çoxluğa malik olmasalar da, hökumətə rəhbərlik edirlər.
Şimali İrlandiyada isə parlamentdə müstəqillik tərəfdarlarının açıq üstünlüyü olmadığı üçün hakimiyyət “güc paylaşımı” modeli əsasında fəaliyyət göstərir.
Bu modelə əsasən, birinci nazir və onun müavini fərqli siyasi partiyalardan seçilir və hər iki vəzifə sahibi bərabər səlahiyyətlərə malik olur.
Hazırda Şimali İrlandiyanın birinci naziri müstəqillik tərəfdarı Mişel O'Nil, onun müavini isə Böyük Britaniya ilə ittifaqın tərəfdarı Emma Little-Pengellidir.
Böyük Britaniyanın baş naziri Endi Börnham isə Şimali İrlandiya əhalisinin əksəriyyətinin Birləşmiş Krallığın tərkibində qalmaq istədiyini müdafiə edir.
Börnham daha əvvəl verdiyi açıqlamalarda Şimali İrlandiya və Şotlandiyanın müstəqilliyi ilə bağlı referendumları dəstəkləməyəcəyini və belə addımların qanunlara uyğun olmayacağını bildirib.
ABŞ Prezidenti Donald Tramp isə ötən gün İrlandiyanın Baş naziri Maykl Martinlə görüşündə Şimali İrlandiya ilə İrlandiya Respublikasının birləşməsini istədiyini deyib və bunun “möhtəşəm” olacağını bildirib.
Şotlandiyanın birinci naziri Con Svinni isə qarşıdakı görüşlə bağlı açıqlamasında Böyük Britaniyanın baş nazirinə mesaj göndərib:
“Börnham Böyük Britaniyanın sonuncu baş naziri olmağa hazır olsun. Tarixdə ilk dəfə Şotlandiya, Uels və Şimali İrlandiya müstəqillik tərəfdarı hökumətlər tərəfindən idarə olunur.”
14:43 13.09.2026
Oxunuş sayı: 68
