Xarici xəbərlər
İndoneziyada sərnişin gəmisindən xəbər yoxdur: 140 nəfər itkin düşüb
İndoneziyada xilasedicilər Yava dənizində itkin düşdüyü bildirilən sərnişin gəmisində olan 140 nəfərin axtarışını davam etdirir. Axtarış-xilasetmə qurumunun rəsmisinin sözlərinə görə, gəmidəki digər 103 nəfər təxliyə edilib, onlardan biri isə həyatını itirib.
Crossmedia.az "Reuters"ə istinadən xəbər verir ki, “Virgo Transport 8” adlı gəmi şənbə günü Şərqi Yavanın Surabaya şəhərindən Cənubi Kalimantan əyalətinin Banjarmasin şəhərinə yola düşüb. Daha sonra gəmi ilə əlaqə kəsilib.
Banjarmasin şəhərindəki axtarış-xilasetmə idarəsinin rəhbəri İ Putu Sudayana video açıqlamasında bildirib ki, 103 nəfər müxtəlif gəmilərin köməyi ilə təxliyə edilib. Onların bir hissəsinin Şərqi Yavadakı limanlardan birinə aparılacağı gözlənilir.
Onun sözlərinə görə, xilasedicilər hadisə ilə bağlı genişmiqyaslı axtarış əməliyyatına başlayıblar. Əməliyyata xilasedici qruplar, gəmilər və helikopter cəlb olunub. Qüvvələr sərnişin gəmisinin son məlum olduğu mövqeyə istiqamətləndirilib.
Rəsmi şəxs gəminin hazırda hansı vəziyyətdə olduğu barədə ətraflı məlumat verməyib.
İndoneziya 17 min adadan ibarət arxipelaq ölkəsidir və bərə nəqliyyatı əhalinin əsas nəqliyyat vasitələrindən biri hesab olunur. Dəniz nəqliyyatı ölkədə hava nəqliyyatından daha ucuz və daha əlçatandır.
Lakin dəniz nəqliyyatında təhlükəsizlik standartlarının hər zaman ciddi şəkildə tətbiq edilməməsi İndoneziyada gəmi qəzalarının sayının nisbətən yüksək olmasına səbəb olur.
13:45 13.09.2026
Oxunuş sayı: 313
