BRICS ölkələri birgə bəyanat qəbul edib
BRICS ölkələri Yaxın Şərqdə davam edən müharibə fonunda maksimum təmkin nümayiş etdirməyə çağıran birgə bəyanat qəbul edib.
Crossmedia.az “Reuters”ə istinadən xəbər verir ki, sənədə İran və Birləşmiş Ərəb Əmirlikləri də qoşulub.
Bəyanat sentyabrın 12-də Hindistanın paytaxtı Yeni Dehlidə keçirilən BRICS sammiti çərçivəsində qəbul olunub. Sənəddə Yaxın Şərq və Qərbi Asiyada gərginliyin davam edən eskalasiyasından dərin narahatlıq ifadə edilib.
“Biz Yaxın Şərq/Qərbi Asiyada gərginliyin davam edən eskalasiyasından dərin narahatlığımızı bildiririk… maksimum təmkin göstərilməsinə və vəziyyəti daha da ağırlaşdıra biləcək hərəkətlərdən çəkinməyə çağırırıq”, – bəyanatda deyilir.
Sənəddə, həmçinin mülki əhalinin qorunmasının, dövlətlərin suverenliyinə və ərazi bütövlüyünə hörmət edilməsinin vacibliyi vurğulanıb. BRICS ölkələri qlobal ticarətin, təchizat zəncirlərinin, enerji axınlarının və dəniz təhlükəsizliyinin qorunmasına çağırış edib.
İran və BƏƏ arasında yüksək səviyyəli görüş
Reuters-in məlumatına görə, İran Prezidenti Məsud Pezeşkian və Əbu-Dəbi Veliahd Şahzadəsi Şeyx Xalid bin Məhəmməd bin Zayed əl-Nəhyan sammitin ilk günü kənar görüş keçiriblər.
Bu, münaqişənin başlanmasından bəri iki ölkə arasında ən yüksək səviyyəli görüş olub. Əbu-Dəbi media ofisi X platformasında bildirib ki, tərəflər regional və beynəlxalq məsələləri, gərginliyin azaldılmasını, sabitliyi, eləcə də regional sülh və inkişafı müzakirə ediblər.
Görüşün konkret nəticələri açıqlanmayıb.
Liderlərdən açıqlamalar
Hindistanın Baş naziri Narendra Modi sammitin açılışında bildirib ki, BRICS yetkinlik mərhələsinə çatıb və birliklə konsensusu konkret nəticələrə çevirməyin vaxtıdır.
Çin Prezidenti Si Cinpin isə BRICS ölkələrinin tarixin düzgün tərəfində dayanaraq beynəlxalq nizamı daha ədalətli istiqamətə yönəltməli olduğunu deyib. O, Çinin Yaxın Şərqdə sülh və sabitliyin təmin olunmasında “lazımi rol” oynamağa hazır olduğunu vurğulayıb.
BRICS haqqında
BRICS 2009-cu ildə ABŞ və Qərb müttəfiqlərinin dominant olduğu dünya nizamına alternativ yaratmaq məqsədilə formalaşdırılıb. Əvvəlcə Braziliya, Rusiya, Hindistan, Çin və Cənubi Afrikadan ibarət olan qrup sonradan Misir, Efiopiya, İndoneziya, İran və Birləşmiş Ərəb Əmirliklərini də əhatə edib.
Ekspertlərin fikrincə, birgə bəyanat mövcud geosiyasi vəziyyətə ciddi təsir göstərməsə də, inkişaf etməkdə olan ölkələr qrupunun birliyini nümayiş etdirir.
Hindistan isə ABŞ, Rusiya, İsrail, İran və Körfəz ərəb dövlətləri ilə əlaqələrini balanslaşdıraraq mürəkkəb diplomatik dialoqları davam etdirməyə çalışır.
23:34 12.09.2026
Oxunuş sayı: 54
