Nağdsız əməliyyatların artımı iqtisadiyyatı şəffaflaşdırır
Nağdsız əməliyyatlar müasir iqtisadiyyatın əsas tələblərindən biridir. Elektron ödənişlərin geniş yayılması təkcə vətəndaşların gündəlik maliyyə əməliyyatlarını asanlaşdırmır, həm də kölgə iqtisadiyyatının azaldılmasına töhfə verir. Bu yanaşma vergi yığımlarını artırmaqla yanaşı, iqtisadi fəaliyyətin daha şəffaf və izlənilə bilən olmasını təmin edir. Həmçinin, rəqəmsal ödəniş sistemləri bizneslər üçün əməliyyat xərclərinin azaldılmasını və daha sürətli xidmət göstərmə imkanlarını yaradır. Bu proses eləcə də, Azərbaycanın dayanıqlı iqtisadi inkişaf hədəflərinə çatmasında əsas prioritetlərdən biri hesab olunur.
Məsələ ilə bağlı iqtisadçı ekspert Eldəniz Əmirov Crossmedia.az-a verdiyi açıqlaması zamanı bildirib ki, son illər nağdsız əməliyyatların tətbiqi və genişləndirilməsi istiqamətində ciddi addımlar atılır. Onun sözlərinə görə, bu, iqtisadiyyatın şəffaflaşmasına xidmət edir və pul dövriyyəsinin daha izlənilə bilən hala gəlməsinə imkan yaradır. Xüsusilə, vergiyığımı sahəsində müsbət təsir göstərərək vergidən yayınma hallarını minumuma endirir:
“Nağdsız əməliyyatların dövriyyədəki payının artması əsasən müxtəlif təşviq tədbirlərinə və qanunvericiliyin tələblərinə bağlıdır. Məsələn, “ƏDV geri al” mexanizmi və digər təşviqedici addımlar bu əməliyyatların genişlənməsinə şərait yaradır. Eyni zamanda, müəyyən məbləğdə limitlərin tətbiqi bu ödəniş növünü məcburi hala gətirir. Bu baxımdan, nağdsız əməliyyatların artımını yalnız iqtisadi göstəricilərlə izah etmək doğru olmaz”.
İqtisadçı ekspert onu da qeydedib ki, sektorlara gəldikdə, nağdsız əməliyyatların payı müxtəlif sahələrdə fərqli göstəricilərə malikdir:
“Məsələn, pərakəndə ticarət sektorunda bu göstərici daha aşağı ola bilər, tikinti sektorunda isə yüksəkdir. Eyni zamanda, xidmət sahələrinin tamamilə POS-terminallarla təchiz edilməsi bu əməliyyat növünün daha geniş tətbiqinə şərait yaradır”.
Son olaraq E. Əmirov vuğulayıb ki, həyata keçirilən tədbirlər və təşəbbüslər nağdsız əməliyyatların dövriyyədəki payının əhəmiyyətli dərəcədə artmasına səbəb olacaq.
Aytac Bəhruzqızı
16:40 28.12.2024
Oxunuş sayı: 6245
