KİV: ABŞ və İran Qırmızı dənizlə bağlı gizli danışıqları genişləndirib
ABŞ və İran arasında qeyri-rəsmi təmasların gündəliyi genişləndirilib. Tərəflər artıq Qırmızı dəniz və Bab əl-Məndəb boğazındakı vəziyyəti də müzakirə edirlər.
Crossmedia.az xəbər verir ki, bu barədə BƏƏ-nin "The National" qəzeti pakistanlı mənbəyə istinadən məlumat yayıb.
Mənbənin sözlərinə görə, pərdəarxasında aparılan növbəti mesaj mübadiləsi əsasən Hörmüz boğazı və Qırmızı dənizdə təhlükəsizlik məsələlərinə həsr olunub. Vaşinqton bu iki akvatoriyada gəmilərə hücumların dayandırılmasına nail olmaq istəyir. Tehran isə bunun müqabilində iyun memorandumunda vəd edilən güzəştlərin, o cümlədən neft satışına imkan yaradılması və sanksiyaların mərhələli yumşaldılmasını tələb edir.
Qəzet qeyd edir ki, husilərin Səudiyyə Ərəbistanına qarşı dəniz blokadası elan etməsindən sonra Bab əl-Məndəb boğazında gəmiçilik 56 faiz azalıb.
Məlumata görə, Pakistanın bu prosesdə rolu artıq vasitəçiliklə məhdudlaşmır. Ötən ilin sentyabrında Ər-Riyadla imzalanmış qarşılıqlı müdafiə sazişinə əsasən, Səudiyyə Ərəbistanı müraciət edərsə, Pakistan Qırmızı dənizdə gəmiçiliyin təhlükəsizliyinin təmin olunması üçün hərbi gəmilər göndərə bilər.
Xatırladaq ki, iyulun 20-də husilər Səudiyyə Ərəbistanına qarşı dəniz blokadası elan edib. Bundan sonra ərəb koalisiyası Bab əl-Məndəb boğazında ticarət gəmilərinin mühafizəsinə başladığını açıqlayıb. Husilər isə Səudiyyə Ərəbistanına məxsus iki neft tankerinə raket və pilotsuz uçuş aparatları ilə zərbə endirdiklərini bildiriblər. Daha sonra koalisiya Yəmənin Hudeyda vilayətində husilərin hərbi obyektlərinə zərbələr endirib. İyulun 25-də isə husilər "Saudi Aramco" şirkətinin Cizan və Yənbu şəhərlərindəki obyektlərinə raket və dronlarla hücum etdiklərini açıqlayıblar.
16:37 28.07.2026
Oxunuş sayı: 43
