Araşdırma: Arıqlama iynələri saç tökülməsi riskini artıra bilər
Mounjaro, Ozempic və Wegovy kimi arıqlama preparatları saç tökülməsi riskini artıra bilər.
Crossmedia.az xəbər verir ki, "Sky News" bu barədə məlumat yayıb.
Pensilvaniya Universitetinin alimləri tərəfindən aparılan araşdırmada təxminən 50 min nəfərin məlumatları təhlil edilib. Nəticələrə əsasən, GLP-1 reseptor aqonistləri adlanan bu preparatlardan istifadə edən şəxslərdə saç tökülməsi (alopesiya) ehtimalı digər diabet dərmanlarından istifadə edənlərlə müqayisədə daha yüksək olub.
Tədqiqat zamanı GLP-1 preparatlarından istifadə edən xəstələr SGLT-2 və DPP-4 inhibitorlarından istifadə edən şəxslərlə müqayisə edilib. Yaş, çəki və digər amillər nəzərə alındıqdan sonra məlum olub ki, GLP-1 preparatları qəbul edənlərdə saç tökülməsi riski SGLT-2 inhibitorlarından istifadə edənlərlə müqayisədə 37 faiz, DPP-4 inhibitorlarından istifadə edənlərlə müqayisədə isə 68 faiz yüksəkdir.
Araşdırma müəllifləri bildiriblər ki, ABŞ-ın Qida və Dərman Administrasiyası (FDA) artıq bu preparatlarla saç tökülməsi arasında mümkün əlaqəni araşdırır. Xüsusilə semaglutid (Ozempic və Wegovy) və tirzepatid (Mounjaro) preparatları ilə bağlı çoxsaylı məlumatlar daxil olub.
Böyük Britaniyanın Dərman və Tibbi Məhsulların Tənzimlənməsi Agentliyi (MHRA) isə 2026-cı ilin əvvəlindən Mounjaro ilə bağlı 400-ə yaxın, Ozempic və Wegovy ilə əlaqəli semaglutid preparatları üzrə isə 148 saç tökülməsi halı barədə məlumat aldığını açıqlayıb.
Alimlər qeyd ediblər ki, saç tökülməsi həyati təhlükə yaratmasa da, insanların özünəinamına, həyat keyfiyyətinə və müalicəyə davam etməsinə ciddi psixoloji təsir göstərə bilər.
03:02 24.07.2026
Oxunuş sayı: 32
