Gündəm

Hər zaman qalib, hər daim müzəffərsən, Azərbaycan!

Müstəqillik hər xalqa nəsib və qismət olmayacaq bir lütfdür. Bunu qazanmaq, əldə etmək üçün qan tökmək, can vermək lazımdır. İstiqlaliyyətini elan edən hər bir xalqın taleyi də, tarixi də qanla yazılır. Odlar diyarı da məhz bu məmləkətlərdəndir ki, atəşinin sönməzliyini təmin etmək naminə on minlərlə qığılcımını-vətəndaşını fəda etmişdir. Bu fədakarlıq sadəcə sözdə deyiləcək və bir müddət sonra unudulcaq bir möhvum deyil, şeirləri, bayatıları, nəğmələri, dastanları, romanları yazmaq üçün istifadə olunan qanlı mürəkkəbdir. Müstəqillik elə bir sevda ki, onun odunda yanmaq yenidən doğulmaq, onun naminə ölmək, əbədi yaşamaqdır. Lakin müstəqilliyi əldə etmək qədər onu qoruyub-saxlamaq da çətin və məşəqqətli bir işdir. Bax, onu qorumaq, bir miras kimi, bir şərəf kimi vətən daşlarının üzərində gəzdirmək də ruhunda Babəkin zərrələrini daşıyan xalqın içindən çıxan cəsur, mərd, igid və şücaətli vətən övladlarının işidir, Azərbaycan adlı eşq ağacının barından bəhrələnən, daşıdığı silahda Qızılbaş mirasını, o silahın mərmisində barıta bulanmış cümhuriyyət qoxusunu gəzdirən Azərbaycan ordusnun namus işidir. Bu gün-26 iyun Azərbaycan Respublikasının Silahlı Qüvvələri günüdür. Bu namuslu işi icra edən, vətənin keşiyində duran, qışda ağ örpəkdən yorğana bürünən, yayda qızmar günəşi müstəqillik atəşinin neməti bilən Azərbaycan ordusunun günüdür bu gün. Şərəfin, qürurun, iftixarın günüdür bu gün. 1918-ci ilin bu günü Azərbaycan Milli Ordusunun yaradılması haqqında qərar qəbul edildi və sadəcə günlər sonra avqust ayının 1-də hərbi nazirlik yaradıldı. O zaman general Səməd Bəy Mehmandarov hərbi nazir kimi fəaliyyətə başladı və general-leytenant Əliağa Şıxlinski nazir müavini təyin edildi. Cümhuriyyətin qurulmasında mühüm töhfələri olmuş şəxslərin ordu rəhbərliyinə gətirilməsi Milli Ordunun daha da inkişaf etməsinə və güclənməsinə təkan vermiş oldu. Sadəcə bir ay öncə öz müstəqilliyini elan edən cümhuriyyətin belə bir qərar qəbul etməsi, bunu icra etməsi cümlə Qafqaz məmləkətlərində geniş səs-səda doğurmuş, xislətində küdurət gizləyən mənfurların qəlbinə xof salmışdı. Çox keçmədən bu şanlı ordu 600 il xilafət sancağını əlində bayraq edib, türklük şanına şan qatan Osmanlı İmperiyasının Qafaz İslam Ordusu ilə birlikdə Bakını və onun ətraf ərazilərini erməni-bolşevik mənfurlarından təmziləyir. Bu minvalla türkün ayaq səsləri Bakıdan mavi Xəzərin o tayına-cahangir Teymurun məmləkətinə, şərqin və qərbin qapısı olan İstanbul qalalarına qədər səs salır. Milli ordumuz daha sonra cümhuriyyətin mövcudluğunu həzm edə bilməyən xainlərin də cavabını verir. Bu da onların aldığı son cavab olur. Belə ki, Milli ordumuz Əsgəran və Muğan istiqamətində əməliyyat planı cızaraq milli hökumətə qarşı baş verən qiyamları yatırır. Hərçənd ki, 1920-ci ilin aprel günündə o qara güruh yenidən tüğyan etdi. Özünü bütün xalqların qanına boyayan adını “Qızıl ordu” qoyub, qırmızı ordu kimi xalq dilində gəzən bu qara bulud Odlar diyarına küdurətini yağdırmaq istədi, istədi ki, yağışı ilə məmləkətin ocağını söndürsün. Bəli, tarix göstərir ki, onlar sərhədləri keçdilər, fiziki, coğrafi, siyasi xəritələrdə Azərbaycanı öz ucqarları kimi göstərdilər. Amma tarix onu da göstərir ki, xalqımızın ruhundakı azadlıq eşqi heç vaxt sönmədi. Təəssüflər olsun ki, bolşevik hökuməti Milli ordunu ləğv etdi və rəhbərlərini Nargin adasına sürgün edərək edam etdirdi. Lakin onların ruhu hər daim Azərbaycan igidlərinin mənəviyyatında yaşayacaq.

Sovet dönəmində uzun müddət təzyiqlərə məruz qalan Azərbaycan ordu quruculuğunu bərpa etməyə çalışsa da, imperiya rəhbərliyi buna imkan vermirdi. Amma Ulu Öndər Heydər Əliyev cənablarının təşəbbüsü ilə 1971-ci ildə Cəmşid Naxçıvanski adına hərbi lisey fəasliyyətə başladı və ordu quruculuğu sahəsində yenidən inkişaf hasil oldu.

1991-ci ildə Azərbaycan öz müstəqilliyini bərpa etdikdən sonra Birinci Qarabağ müharibəsi səbəbindən hərbi quruculuq məsələləri irəliləyə bilmirdi. Ancaq 1993-cü ildə Heydər Əliyevin xalqın kəskin təkidi ilə hakimiyyətə gəlməsi və 1994-cü ildə Bişkek protokolu ilə atəşkəsə nail olmasından sonra ölkəmizdə ordunun inkişafı üçün islahatlar həyata keçirildi. Ümumilli liderin təşəbbüsü ilə Silahlı Qüvvələrimiz Türkiyə, ABŞ, Rusiya, Ukrayna, Böyük Britaniya, Almaniya kimi ölkələrdə hərbi təlimlər keçmiş, neft sənayesinin inkişafı fonunda dövlət büdcəsində gəlirlərin artması paralelində Azərbaycan ordusu dövrün müasir silahları ilə təmin edilmişdir. 1998-ci ildə isə Heydər Əliyevin sərəncamı ilə 26 iyun Azərbaycan Respublikasının Silahlı Qüvvələri günü kimi elan edildi.

Məhz Ümumilli Liderin diqqəti və qayğısı, daha sonra isə Müzəffər Ali Baş Komandanın yürütdüyü hərb siyasəti ordumuzun güclənməsinə, 2016, 2018-ci illərdə öz gücünü göstərməsinə və 2020-ci ildə Azərbaycana qalib dövlət adını qazandırmasına səbəb oldu. Antiterror əməliyyatları və sentyabr döyüşlərində də Azərbaycan ordusu öz şücaətini ləyaqətlə nümayiş etdirçişdir.

Sən hər zaman qalib, hər daim müzəffərsən, Azərbaycan!