Ukrayna hava müdafiəsinin effektivliyini yüksəltməyə çalışır
May ayında Rusiya Ukraynaya qarşı ümumilikdə 8150 ədəd Shahed tipli pilotsuz uçuş aparatı (PUA) buraxıb. Crossmedia.az bu barədə xarici mediaya istinarən xəbər verir.
Məlumata görə, onların 7476-sı məhv edilib ki, bu da təxminən 90,75 faizlik zərərsizləşdirmə göstəricisinə uyğundur.
Məlumata əsasən, ən intensiv hücum mayın 13-dən 14-nə keçən gecə qeydə alınıb. Həmin vaxt Rusiya qüvvələri 1500-dən çox drondan istifadə edib.
Ukrayna hava hücumundan müdafiə sistemlərinin qarşısına qoyulan əsas məqsəd məhvetmə göstəricisini 95 faizə çatdırmaqdır. Hazırda müdafiə fəaliyyətinin ən azı yarısının interceptor dronların payına düşdüyü və onların hava hücumundan müdafiənin əsas elementlərindən birinə çevrildiyi bildirilir.
Bununla yanaşı, raket hücumları Ukrayna üçün daha ciddi çağırış olaraq qalır. Aşkarlanan 221 raket hədəfindən yalnız 112-nin vurulduğu, bunun isə 53 faizlik nəticəyə bərabər olduğu qeyd edilir.
Ekspertlərin fikrincə, əsas problem ballistik raketlərə qarşı müdafiə imkanlarının məhdud olmasıdır. Qanadlı raketlərin qarşısını almaq nisbətən daha asan hesab edilir. Belə ki, iyun ayında həyata keçirilən hücumlardan biri zamanı buraxılan 33 qanadlı raketin 32-si zərərsizləşdirilib.
Mütəxəssislər vurğulayırlar ki, ballistik raket təhdidlərinə qarşı effektiv müdafiə üçün Patriot tipli müasir hava hücumundan müdafiə sistemlərinin sayı həlledici əhəmiyyət daşıyır.
13:45 14.06.2026
Oxunuş sayı: 56
