Hansı xəstəliklərə qarşı peyvənd vurulmalıdır? - Pediatr RƏYİ
Peyvəndlər insan orqanizmini müəyyən yoluxucu xəstəliklərdən qorumaq üçün hazırlanmış bioloji preparatlardır. Onlar immun sistemini gücləndirir və xəstəlik törədən virus və bakteriyalarla mübarizə aparır. Peyvəndlər insanları ciddi xəstəliklərdən qoruyur.
Mövzu ilə bağlı həkim-pediatr Gülşən Əliyeva Crossmedia.az-a açıqlama verib:
“Müasir dövrümüzdə insanların sayı artır və bununla da yoluxucu xəstəliklərin yayılma ehtimalı da çoxalır. Bu səbəbdən günümüzdə peyvəndlərin olunması çox vacibdir. Çünki peyvəndlər yayılan epidemiyaların, pandemiyaların qarşısını alıb. Son dövrdə, COVID zamanı biz bunu müşahidə etdik. Peyvəndlər bütün xəstəliklərə qarşı vurulmur. Yəni hansı xəstəliyin ki, orqanizm özü öhdəsindən gələ bilir və yaxud da onların müalicəsi əlçatandır, o xəstəliklərə qarşı peyvəndlər vurulmur. Peyvənd o xəstəliklərə qarşı vurulur ki, xəstəlik həqiqətən orqanizmə çox ciddi fəsadlar verir, uşaqlarda ölümə səbəb olur və yaxud da hər hansı bir yan təsirə səbəb olur. Bu cür xəstəliklərə qarşı mütləq peyvənd vurulmalıdır”.
Gülşən Əliyeva peyvəndin fəaliyyət prinsipi haqqında da danışıb:
“Peyvənd özü tərkibində xəstəliyin törədicisi olan virusun və yaxud da mikrobun bir hissəsini, çox zəiflədilmiş formasını saxlayır ki, bu da xəstəlik törətmə qabiliyyətinə malik deyil. O, orqanizmə yeridilir və orqanizmdə ona qarşı immun reaksiyası yaranır. Bu nə deməkdir? Yəni orqanizm o yad cismi canlı virus, mikrob kimi qəbul edir və ona qarşı qoruma yaratmağa başlayır. Növbəti dəfə orqanizm o virusla, mikrobla kontakt olduqda hazır olur və həmin infeksiyanı tez bir zamanda məhv edir, xəstəliyin inkişaf etməsinə imkan vermir. Düşünürəm ki, peyvənd olunmaq çox vacibdir. Əsasən də uşaqlar üçün əhəmiyyətlidir. Peyvəndlər ən çox körpə uşaqlara vurulur. Çünki letallıq ən çox bir yaşına qədər rast gəlir. Bu da uşaqların immun sisteminin formalaşmaması ilə əlaqəlidir. Məsələn, əgər bir populyasiyada 1000 nəfərin 900 nəfəri peyvənd olunursa, zəncir qırılır və o xəstəliyin ötürülmə ehtimalı azalır. Lakin bir populyasiyada 1000 nəfərdən 100-200 nəfəri peyvənd olunursa, o populyasiyada o xəstəliyin yayılma sürəti artır və daha çox insanların yoluxmasına səbəb olur”.
Həkim pediatr peyvəndin əhəmiyyətindən də danışıb:
“Pandemiyadan sonra qızılca xəstəliyinin yayılması məhz poliklinikalara gedişin azalması, əsasən uşaqların qızılca peyvəndi almaması ilə bağlıdır. Nəticədə bir neçə il sonra qızılca epidemiyası ilə qarşılaşdıq, ağır bir xəstəlik olduğunu gördük. Mən düşünürəm ki, peyvənd bir fürsət, kəşfdir və ondan istifadə etmək lazımdır. Müasir peyvəndlər çox təkmilləşib və onlar həyat qurtarır. Bəzən valideynlər deyir ki, peyvəndlər uşaqlara fəsad verə bilər. Belə halın yaşanmaması üçün uşaqlar peyvənd olunmamışdan əvvəl hərtərəfli yoxlanılmalıdır”.
Bahar Musayeva
13:15 03.12.2024
Oxunuş sayı: 32594
