İlk müsəlman, şiə və sosialist lider Nyu-York meri seçilib: ABŞ-də vəziyyət çox gərgin olacaq - Politoloq
ABŞ-da keçirilən seçkilərdə Zöhran Mamdani Nyu-Yorkun yeni meri seçilib. O, şəhər tarixində ilk müsəlman, şiə və sosialist lider kimi tarixə düşüb. Demokratlar Donald Trampın hakimiyyətə qayıdışından sonra ilk böyük qələbələrini qazanaraq Nyu-Cersi və Virciniyada da qalib gəliblər.
Mövzu ilə bağlı ƏHD Partiyasının mətbuat xidmətinin rəhbəri, politoloq Əli Zülfüqaroğlu Crossmedia.az-a açıqlama verib: “Hazırda Birləşmiş Ştatlarda çox gərgin bir vəziyyət davam edir. Xüsusilə shutdown qərarının yaratdığı problem getdikcə Trump hükumətini daha çətin vəziyyətə salır. Hava məkanının bağlanma ehtimalının artması, dövlət qulluqçularının, hərbi qulluqçuların maaşlarının verilməsi ilə bağlı çətinliklərin yaranması problemi daha da dərinləşdirir. Təbii ki, bu da təsadüfi hesab oluna bilməz. Çünki, Birləşmiş Ştatların idarəçiliyi ilə bağlı qlobalistlərlə Trampın təmsil etdiyi Amerikan milliyyətçiləri arasında problemlər daha da dərinləşir, daha açıq müstəviyə daşınır. Belə olan məqamda Nyu-Yorkun demokratların nəzərətinə keçməsi təbii ki, təsadüfi hal sayıla bilməz. Mən təbii ki, bunu da da qlobalistlərlə Tramp arasında gedən mübarizənin təzahürü kimi qiymətləndirirəm. Obama da vaxtı ilə müsəlman kimliyi ilə diqqət çəkirdi və hakimiyyətə gəldikdən sonra Yaxın Şərqdə və digər İslam dünyasına yönəlik daha radikal addımlarla, mənfi fəaliyyətlə yadda qaldı. Mamdani ilə bağlı da eyni fikirləri səsləndirmək mümkündür. Təbii ki, bir sıra gerçək məqamlar da var ki, Obamanın demokrat olduğu halda Mamdanini tam dəstəkləməməsi, eyni zamanda digər demokrat siyasilərdən Mamdaninin tam dəstək görməməsi ilə bağlı maraqlı nüanslar var”.
Ekspert bildirib ki, bu Amerika tarixində kifayət qədər diqqət çəkən hadisədir: “Bundan sonra Birləşmiş Ştatların daxili siyasi vəziyyətinin daha gərgin motivlərlə yadda qalacağını söyləyə bilərik. Hesab edirəm ki, yaxın perspektiv üçün Birləşmiş Ştatlarda həm Nyu-York seçkilərinin nəticəsi olaraq bir sıra maraqlı nüanslar meydana çıxacaq. Digər tərəfdən isə təbii ki, hazırda Birləşmiş Ştatlarda baş verən istər shutdown olayları, istər bundan yaranan dövlətin dərin böhrana sürüklənmə cəhətləri daha ciddi və tarixi proseslərin əsasını qoyacaq”.
Zeynəb Xuduyeva
20:23 05.11.2025
Oxunuş sayı: 1760
