Qrossi: İran bu şəkildə davam etsə, NPT-ni pozan ölkə elan oluna bilər
Beynəlxalq Atom Enerjisi Agentliyinin (AEBA) baş direktoru Rafael Qrossi İranın nüvə proqramı ilə bağlı ciddi xəbərdarlıq edib.
Crossmedia.az bu barədə xarici mediaya istinadən xəbər verir.
Onun sözlərinə görə, agentlik hələ də İranın zənginləşdirilmiş uran ehtiyatlarının və hücuma məruz qalmış nüvə obyektlərinin hazırkı vəziyyəti barədə tam məlumat əldə edə bilməyib.
Qrossi bildirib ki, mövcud vəziyyət davam edərsə, Tehran rəsmi şəkildə NPT — Nüvə Silahlarının Yayılmaması Müqaviləsini pozan ölkə kimi tanına bilər.
Davosda keçirilən World Economic Forum çərçivəsində çıxış edən AEBA rəhbəri qeyd edib ki, agentlik iyun ayında hücuma məruz qalmayan İranın bəyan edilmiş 13 nüvə obyektində yoxlamalar aparıb. Lakin AEBA müfəttişlərinə Fordo, Nətənz və İsfahan nüvə mərkəzlərinə giriş icazəsi verilməyib.
Qrossinin sözlərinə görə, İran xüsusilə 60 faizə qədər zənginləşdirilmiş 440,9 kiloqram uran ehtiyatının taleyi və sözügedən obyektlərin vəziyyəti ilə bağlı AEBA-ya rəsmi hesabat təqdim etməlidir.
“Bu vəziyyət sonsuza qədər davam edə bilməz. Bir məqamda deməliyəm ki, bu materialların harada olduğunu bilmirəm”, – deyə AEBA-nın baş direktoru vurğulayıb.
Qeyd edək ki, İranın nüvə proqramı ətrafında qeyri-müəyyənliyin davam etməsi beynəlxalq ictimaiyyətdə narahatlığı daha da artırır və Tehranla Qərb arasında gərginliyi dərinləşdirir.
15:03 21.01.2026
Oxunuş sayı: 1216
