Deputat: Alimlərin əməkhaqları daha yüksək olsa...
Qlobal miqyasda elmi inkişaf dövlətlərin strateji gücünün əsas göstəricilərindən biri hesab olunur. Elmi potensialı güclü olan ölkələr həm iqtisadi, həm texnoloji, həm də ideoloji üstünlük əldə etməklə beynəlxalq rəqabətdə daha dayanıqlı mövqe tutur. Azərbaycan da sürətlə dəyişən dünya reallıqları fonunda elmin inkişafını prioritet istiqamətlərdən biri kimi müəyyən edib. Lakin müasir tələblər, yeni çağırışlar, elmi-tədqiqat mühitində baş verən transformasiyalar, gənclərin elmə marağının azalması və institusional koordinasiya boşluqları ölkədə elmi idarəetmənin daha sistemli yanaşma tələb etdiyini ortaya çıxarır. Elə bu səbəbdən də elmin dövlət strategiyası səviyyəsində yenidən dəyərləndirilməsi, prioritetlərin dəqiqləşdirilməsi, maliyyələşmə modelinin təkmilləşdirilməsi və elmi institutlararası əməkdaşlığın genişləndirilməsi zərurətə çevrilib.
Azərbaycan Milli Elmlər Akademiyasının vitse-prezidenti, akademik Rasim Əliquliyevin “Sosial-siyasi elmlər müasir çağırışlar fonunda: Beyin mərkəzləri, akademik elm və universitetlər” mövzusunda keçirilən dəyirmi masada səsləndirdiyi fikirlər də mövcud vəziyyətin multidisiplinar yanaşma tələb etdiyini təsdiqləyir. Akademik qeyd edib ki, bir tərəfdən gənclərin elmə maraq göstərməməsi səbəbləri kompleks qaydada araşdırılmalı, digər tərəfdən isə müzakirələr təkcə akademik auditoriya ilə məhdudlaşmamalı, dövlət strukturları, tədqiqat mərkəzləri, maliyyə və idarəçilik sahələri də bu prosesə aktiv şəkildə cəlb olunmalıdır. Elmi inkişaf yalnız intellektual potensialın deyil, həm də institusional koordinasiyanın, beynəlxalq əməkdaşlığın və innovasiyaya açıq təfəkkürün nəticəsi olduğundan, ölkədə elmin inkişafına dair dövlət strategiyasının formalaşdırılması artıq strateji zərurət kimi ortaya çıxır.
Məsələ ilə bağlı Milli Məclisin deputatı Ceyhun Məmmədov Crossmedia.az-la öz fikirlərini bölüşüb: "Düşünürəm ki, bu məsələ ciddi şəkildə araşdırılmalı və üzərində sistemli şəkildə dayanılmalıdır. Çünki bu vəziyyətin yaranmasına təsir edən bir sıra əsaslı amillər mövcuddur. Birinci səbəb kimi göstərmək olar ki, gənclərin böyük bir qismi daha gəlirli sahələrə meyillənir və öz fəaliyyətlərini həmin istiqamətdə qurmağa çalışırlar. Bu isə, sözsüz ki, həmin sahədəki maaş səviyyəsinin kifayət qədər yüksək olmaması ilə bağlıdır. Yəni əməkhaqqı məsələsi burada mühüm rol oynayır və bu amili ciddi şəkildə nəzərə almaq lazımdır".
Deputat, həmçinin ikinci mühüm məsələnin isə təbliğat və maarifləndirmə işləri olduğunu qeyd edib: "Gənclər bu sahəyə istiqamətləndirilməli, onlarda maraq və həvəs formalaşdırılmalıdır. Bu proses təsadüfi və öz-özünə baş verməyəcək. Əvvəlcə marağın yaradılması vacibdir, bundan sonra isə sistemli və ardıcıl işlərin aparılması ciddi nəticələr verə bilər. Hesab edirəm ki, alimlərin əməkhaqları daha yüksək olsa, həmçinin təşviqat və təbliğat fəaliyyətləri intensiv və məqsədyönlü şəkildə həyata keçirilsə, bu sahədə əhəmiyyətli nəticələr əldə etmək mümkün olacaq. Əks halda, müəyyən çətinliklərin və problemlərin ortaya çıxması qaçılmazdır".
Elmir Heydərli
11:34 05.12.2025
Oxunuş sayı: 2568
