Azərbaycanla Mərkəzi Asiya respublikaları arasında əlaqələrin yeni mərhələyə çıxması geniş imkanlar yaradır- Rəy
Müasir beynəlxalq münasibətlərdə regional əməkdaşlıq və qlobal koordinasiya sistemində iştirak hər bir dövlətin siyasi nüfuzunu, iqtisadi potensialını və mədəni təsirini artırmaq baxımından böyük əhəmiyyət kəsb edir. Azərbaycan, strateji mövqeyi, zəngin təbii resursları və sürətlə inkişaf edən sənaye və texnoloji potensialı ilə Mərkəzi Asiya dövlətləri arasında etibarlı və aktiv tərəfdaş kimi tanınır. Ölkəmizin Məşvərət Görüşləri formatına qoşulması isə regional və beynəlxalq səviyyədə rolunu daha da gücləndirərək, ortaq rifaha doğru irəliləyiş və əməkdaşlıq imkanlarını genişləndirən vacib addım kimi qiymətləndirilir.
Milli Məclisin deputatı Vüqar Rəhimzadə Crossmedia.az-a bildirib ki, Özbəkistanın paytaxtı Daşkənddə keçirilən Mərkəzi Asiya Dövlət Başçılarının 7-ci Məşvərət Görüşü Azərbaycan üçün strateji əhəmiyyət daşıyır: "Bu toplantı yalnız diplomatik forum deyil, həm də Azərbaycan və Mərkəzi Asiya ölkələri arasında əlaqələrin keyfiyyətcə yeni mərhələyə qədəm qoyması deməkdir. Prezident İlham Əliyevin Özbəkistana səfəri, tədbirdə çıxışı, qəbul olunan qərarlar və imzalanan sənədlər tarixi əhəmiyyətə malikdir".
Deputat vurğulayıb ki, Azərbaycan və Mərkəzi Asiya artıq sadəcə coğrafi qonşular deyil, Avrasiyada yeni güc mərkəzi yaradan strateji tərəfdaşlardır: "Onları birləşdirən dərin tarixi köklər, ortaq iqtisadi maraqlar və mədəni əlaqələrdir. Azərbaycanın Mərkəzi Asiya platformasında tamhüquqlu iştirakçı statusu xarici siyasətimizin növbəti uğurudur. Artıq Azərbaycan Mərkəzi Asiya Dövlət Başçılarının Məşvərət Görüşü çərçivəsində keçiriləcək bütün görüşlərdə iştirak edəcək. Bu, ölkəmizin həm siyasi, həm də geoiqtisadi mövqeyini gücləndirir və regionda strateji qarşılıqlı əlaqəni təmin edir".
V.Rəhimzadə əlavə edib ki, Azərbaycanla Mərkəzi Asiya arasında əlaqələrin yeni mərhələyə çıxması beynəlxalq tranzit, logistika və energetika sahələrində geniş imkanlar yaradır: "Prezident İlham Əliyev də çıxışında bildirdi ki, Azərbaycanla Mərkəzi Asiya dövlətləri arasında münasibətlər xüsusi xarakter daşıyır. Bizi çoxəsrlik ortaq tarix, mədəni irs, qardaşlıq və dostluq birləşdirir. Bu əlaqələr artıq strateji tərəfdaşlıq xarakterinə malikdir və regionda həm ölkələrimizin, həm də bütövlükdə Mərkəzi Asiyanın maraqlarına xidmət edir".
Mehriban Yariyeva
19:53 20.11.2025
Oxunuş sayı: 1474
